Immikkut iliuuseqarnissaq

Sinerissami eqqartuussivinni suliassat naamassiniarneqarnissaat siunertaralugu immikkut iliuuseqarnissaq

Piffissap sivisujaap ingerlanerani nunatsinni eqqartuussivinni suliassat angumersiffigineqarsinnaanatik ernumanartumik amerlatsikkiartorsimapput. Tamanna nunatsinni innuttaasut inatsisit inuttullu pisinnaatitaaffeqarnerannut sanilliullugit ajornartorsiutaaleriartortoq isertuunneqarsinnaajartuaarsimavoq. Taamaattumik Ilaqutariinnermut Inatsisinillu Atuutitsinermut Naalakkersuisup Danmarkimi inatsiseqarnermut ministerimik ataatsimeeqateqarnermigut taamatullu Nunatsinni Eqqartuussiveqarnermi Siunnersuisoqatigiit suleqatigalugit anguniarneqarsimavoq, danskit naalakkersuisuisa aqqutissiuutissagaat suliassat 8.000-t missiliorlugit eqqartuussivinni suliaritinneqarnissaminnut utaqqisinneqartut sapinngisamik piaarnerpaamik suliarineqarsinnaalernissaat.

Taamaattumik Ilaqutariinnermut Inatsisinillu Atuutitsinermut Naalakkersuisup Martha Lund Olsen-ip nuannaarutigalugu danskit inatsiseqarnermut ministeriannit Morten Bødskov-imit nalunaarutisiarisimavaa, danskit naalakkersuisuisa immikkut aningaasaliissuteqarnermikkut suligasuartitsiniarlutik, taamaasiornikkullu eqqartuussivinni suliarisassatut utaqqisinneqartut piaartumik naamassiniarneqassasut.

Anguniarneqarpoq inuinnaat saqittaattarneranni aammalu pinerluttaalisitsinermut tunngatillugu suliassat piffissami sapinngisamik sivikinnerpaami naamassiniarneqarnissaat. Tamanna siunertaralugu danskit naalakkersuisuisa immikkut 5 mio. kr.-nit 2014-mut atugassiissutigisimavaat, taamatullu 2015-mi 2016-milu 8 aamma 7 mio. kr.-nit immikkut iliuuseqarnissamut aningaasaliissutigisimallugit.