Karl Lyberthip Gunnar Bragi Sveinssonimik naapitsinera

Aalisarnermut, Piniarnermut Nunalerinermullu Naalakkersuisoq islandimi nunanut allanut ministeri ataatsimeeqatigivaa

Islandimi nunanut allanut ministerip Gunnar Braig Sveinssonip Nuummut tikeraar­ne­ranut atatillugu Aalisarnermut, Piniarnermut Nunalerinermullu Naalakkersuisoq Karl Lyberth ataatsimeeqatigivaa, tassani aalisarnermi, nunalerinermi aamma inuussutis­salerinermi suliaqarnerup iluani ineriartortitsinissaq aamma suleqatigiinnerup anner­tusarneqarnissaanik periarfissaasunik oqaloqatigiissuteqarnerisigut.

Pissusisamisuuginnarpoq nunat sanileriit Kalaallit Nunaat aamma Island suleqatigiis­suteqarpata, pingaartumik suliaqarfinnut soqutigisaqaqatigiiffiusunut aamma unammi­nartoqarfioreersunut. Nunanut marlunnut taakkununnga ersarissumik pitsaaqutissa­qareerpoq qaninnerusumik suleqatigiissuteqarsinnaagunik soorlu inuussutissalerinerup iluani, tassanimi tamattaalluta assigiinnik unammilligassaqareerpugut aamma suliaqar­fimmut ilisimasatsinnik aamma pisuussutitsinnut atatillugu iluaqusiisinnaanerput pillugu.

Ataatsimiinnermi eqqartorneqartut pillugit Karl Lyberth imaattumik oqaaseqarpoq: ”ataatsimiinneq ikinngutinnersumik ammasumillu oqaloqatigiinnermik tunngaveqarluni ingerlavoq. Kalaallit Nunaat aamma Island assigiissunik arlalinnik soqutigisaqaqati­giipput imminnullu unamminarsinnaalluartunik avitseqatigiissuteqarsinnaallutik, taamaammallu pissusissamisuuginnarpoq ilisimasat aamma misilittakkat pillugit atorluaaqatigiissinnaaneq. Siunissami Islandimik suleqateqarneq sunniuteqarluartoq qilanaaraara.”

Aalisarnermi, aalisakkanillu tunisassiornermi aamma nunaateqarnerup iluani suleqati­giiffiusinnaasunik periarfissaqarluarpoq. Siunissami tamanna annertusarneqarusuppoq. Siunissami suleqatigiinnerulernissaq pillugu Aalisarnermut, Piniarnermut Nunaleriner­mullu Naalakkersuisup, Karl Lyberthip aamma Islandip nunanut allanut ministeriata Gunnar Braig Sveinssonip isumaqatigiipput Nuummi Islandip aallartitaqarfia aqquti­galugu qanittumik suliniuteqarnerulertariaqarlutik.