Islandip Generalkonsuleqarfianik Nuummi ammaaneq

 

Tallimanngorneq 8. novembari, Islandip Nunanut allanut ministeria Gunnar Bragi Sveinsson peqatigalugu, Nuummi Islandip Generalkonsuuleqarfia Naalakkersuisut Siulittaasuata atoqqaartissavaa. Tamanna pissaaq sivikikkaluamik nalliuttorsiorpalaartumik nunatsinni Biskopip allaffigisimasaani Hans Egedesvej 9-imi katerisimaarnermi nal. 16:40-17:00. Pisussaq tamanut ammasumik ingerlanneqassaaq.

Islandip Nunanut Allanut ministeriata Nuummi 8.-9. novembari tikeraarneranut atatillugu Naalakkersuisut Siulittaasuat kiisalu Piniarnermut, Aalisarnermut Nunalerinermullu Naalakkersuisoq tamarmik ataatsimeeqatigineqassapput.

Tallimanngorneq 8. novembari immikkut ataatsimiinnerni Islandimiut-Kalaallit Ataatsimoorlutik nalunaarutaat, suliassaqarfiit arlalippassuit iluanni Islandip aamma Kalaallit Nunaata akornanni qaninnerusumik suleqatigiinnissamut aqqutissiuisussaq, atsiorneqassasoq naatsorsuutigineqarpoq.

Aleqa Hammond:
- Islandip Nuummi Generalkonsuuleqarfimminik ammaanermini Kalaallit Nunaannut attaveqarneq qanoq pingaartitsigalugu takutimmagu nuannaarutigisorujussuuara. Nunat marluk akornanni ataqatigiinneq taanna illuatungeriinnit pingaartinneqarpoq. Suliassaqarfiit Islandip aamma Kalaallit Nunaata qaninnerujussuarmik suleqatigiinnissaannut periarfissaqarfiusut arlalippassuupput. Periarfissat taakkua ukiuni aggersuni ataatsimoorussamik iluaqutaasumik atorluassamaarlugit eqqarsaatigaara.


Nuummi Islandip Generalkonsuuleqarfia generalkonsulimit, Ambassadør Petur Asgeirsson-imit, Islandip nunanut allanut ministereqarfiannit atorfilittatut aallartitaasumit aqunneqassaaq.

Generalkonsulat sunaava?

Asseq: Naalakkersuisut siulittaasuat Aleqa Hammond aamma Islandip nunanut allanut ministeria Gunnar Bragi Sveinsson, siusinnerusukkut Islandimi naapinneranniit.