G.A.-imersumut Brian Buusimut akissut

All. Naalakkersuisut siulittaasuat Aleqa Hammond, Ineqarnermut, Pinngortitamut Avatangiisinullu Naalakkersuisuugallartoq

G.A.’p direktøriata Brian Buusip ulloq 31. oktober 2013 KNR-ip nittartagaa aqqutigalugu Naalakkersuisut uparuarpai iliuuseqanngippallaarnerarlugit. Brian Buusip tunuliaqutai eqqarsaatigalugit  pissusiviusut ilisimagai isumaqarnassagaluarpoq, tassami sanaartugassanut tunngatillugu suliniutit ukiumut tullermut Aningaasanut Inatsisissatut siunnersuutip Inatsisartunit akuerissutigineqarnerata kingorna sanaartugassanut suliniutit ataasiakkaat pilersaarusiorneqaqqaartarmata, suliarinnittussarsioqqaarneqartarmata tamatumalu kingorna suliarinnittussanut isumaqatigiissutissat atsiorneqaqqaartarlutik.

Tamanit ilisimaneqarpoq sanaartugassanut aningaasaliissutissat ataasiakkaat aningaasaliissutigineqarsimatinnagit akuerineqarsimatinnagillu allaffissornikkut aningaasanik atuisoqarsinnaanngimmat. Aamma  tamanit ilisimaneqarpoq sanaartugassanut pilersaarutiviit suliarinnittussarsiornermilu atortussat suliarineqarsimatinnagit suliarinnittussarsiortarnerit ingerlanneqarsinnaaneq ajormata. Taamatuttaaq pissusiviuvoq sanaartortussanut isumaqatigiissutissat atsiorneqarsinnaaneq ajormata suliarinnittussarsiornermi angusat aningaasalissutigineqarsimasunit nikingassuteqartillugit.  Tamakkuupput tamat oqartussaaqataanerat naapertorlugit ingerlatseriaatsit.

Taamaattumik Brian Buus uppernarsaatissaqanngitsumik  ”aningaasarpassuit uninngaannartut aammalu suliniutinut arlalinnut aningaasaliisoqareersimagaluartoq sanaartugassat uninngatiinarneqartut”-imik oqariartuuteqarnera isumaqatiginngilara. Ilisimatitsissutigisinnaavara  2012-ip naalernerani sanaartugassanut aningaasaliissutit tamarmiusut 194 mio. kr.-iusut 10 procentiinnaat atorneqarsimammata, atorneqarsimasullu 13 mio. Kr.-iummata. 2012-imi pilersaarutit allat tamarmik toqqaananngitsumik toqqaanartumilluunniit aningaasaliissutigineqarsimasut 10 procentiinit annerusumik atuiffiusimapput.

Naalakkersuisut sulipput Kalaallit Nunaat innuttaasullu tamarmiusut sullikkumallugit. 2014-imut Aningasanut Inatsisissatut siunnersuut taamatut takutitsiviuvoq. Taamaattumik suleqatigiilluta siunissatsinnut pitsaanerpaamik aqqutissarsiorta,  inuiaqatigiinnut minnerunngitsumillu innuttaasunut iluaqutaasussamik.