Naalakkersuisut Avannaani Kujataanilu ilaasunik angallassineq pitsanngorsaavigaat

 

2014-imut Aningaasanut inatsisissap suliarinerani illoqarfinnut nunaqarfinnullu arlalinnut taakkunanngalu angalanermi periarfissat immikkut ittumik iliuuseqarfiginissaat Naalakkersuisut qinerpaat.

 

2014-imut Aningaasanut inatsisissatut siunnersuut 6. november Inatsisartuni oqaluuse­rineqassaaq. Aappassaaneerneqarnissaa sioqqullugu Nunatta Avannaani Kujataanilu ilaasunik angallassinerup annertusineqarnissaanut Naalakkersuisut 2,2 mio. koruuninik illikartitsipput.

 

Diskobugtimi, tassa Qeqertarsuarmi, Kangaatsiami Attumilu nunaqartut qilanaarisin­naavaat imaatigut angalatitsinerup nalaani, tassalu 2014-imi majip aallaqqaataaniit oktoberip naggataata tungaanut, Disko Line sap.ak. ataasiarluni aqqusaar­neqarne­rusalertussaammat.

 

Tamanna aamma Arsummiunut atuutissaaq, tassa Arctic Umiaq Linemik sullissisumit 2014-imi piffissami majip aallaqqaataaniit augustip naggataata tungaanut sap.ak. ataasiarluni Arsuk tikinneqarnerusalissammat.

 

-“Illoqarfinni nunaqarfinnilu pineqartuni najugallit qangalili kissaatigisimavaat Nu­natsinni allanukarnissaminnut periarfissamik pitsanngorsaavigineqarnissaat. Tamanna tunuliaqutaralugu pineqartuni taakkunani immikkut iliuuseqarnissaq Naalakkersuisut qiner­paat”, taama oqaaseqarpoq Peqqissutsimut Attaveqarnermullu Naalakkersuisoq Steen Lynge.

 

 

Paasissutissat sukumiinerusut pissarsiariniaraanni Peqqissutsimut Attaveqarnermullu Naalakkersuisoq Steen Lynge, allattaa Aviâja Mørch Amondsen aqqutigalugu oqarasuaatikkut +299 55 33 03 imaluunniit e-mailikkut avma@nanoq.gl attaveqarfigineqarsinnaavoq.