Siunissami politikkissamut tunngavissaq

Aalisarneq pillugu siunissami politikkissamut tunngavissaq Naalakkersuisut akuersissutigaat

Aalisarnermut pisuussutinullu akitsuusiisanermut inatsisip nutarterneqarnerata suliarinerata ingerlaqqinnissaanut siunertat tunngavissallu Naalakkesuisut akuersissutigaat. Suleriaqqinnissami kattuffiit aningaaseriviillu akuutinneqassapput.

Nungusaataanngitsumik aalisarnerup inuiaqatigiinni aningaasatigut annerpaamik pissarsiffigineqarnissaa anguniagaavoq. Aalisarnerneq pillugu pisuussutinillu akitsuusiisarnermut ataatsimoortumik inatsisit pillugit inatsisissatut nutaatut siunnersuut Inatsisartut 2014-mi ukiakkut ataatsimiinnerannut Naalakkersuisut saqqummiutilersaarpaat. Tamanna pitinnagu inatsisiliornermi sulineq sukumiisumik ingerlanneqassaaq, tassungalu akuutinneqassapput aalisarnermik inuussutissarsiortut kiisalu aningaasanik atukkiussisartut.

Aalisarneq pillugu siunissami politikkimik suliaqarnermi makku ilaatigut tunngaviussapput:

  • Aalisarnermik inuussutissarsiornermi sinaakkutissat sapinngisamik patajaatsuussapput, aningaasaliissutit qulakkeerutissaannik aningaasaliissutinut qularnaveeqqusiisoqarsinnaassasoq pissarsinartumillu aalisarneq siuarsarneqarluni, taamaasilluni aalisariutit nutaaliaasut nunamilu aalisakkeriviit aserfallatsaalinissaannut nutarternersaannullu aalisarnermik inuussutissarsiuteqartut periarfissaqaleqqullugit.

    • Siunissaq ungasinnerusoq isigalugu nungusaataanngitsumik pisuussutinik atuinissamik pisariaqartitsineq aammalu inuussutissarsiortut isertitaqarluarnissaannut patajaatsumik tunngavissinneqarnissaat aalisarnermik aqutsinerup tapersersueqataaffigissavai.

    • Inuussutissarsiornermut sinaakkusiunneqartut periarfissiissasut kinguaariinnut paarlaattoqarsinnaalernissaanut aammalu aalisartunngorlaat aalisarnermut appakaassinnaalernissaannut.

    • Sinerissamut qanittumi aalisarnermi naleqquussaanermut aammalu aalisariutinut nioqqutissiorfinnullu aningaasaliinerit sapinngisamik namminersortunit pissasut kiisalu avataasiorluni aalisarneq suli namminersortunit aningaasaliiffigineqassasoq.

    • Sinaakkutissatut atugassiissutit aalisarnermillu aqutsineq aalisakkat aalisarneqareersut tamakkiisumik atorluarnissaannik aammalu aalisakkanik suli aalisarneqalinngitsunik aalisalernissamut soqutiginnilersitsissapput, tassunga ilaalluni misileraalluni aalisartitsinineq.

Aalisarnermut, Piniarnermut Nunalerinermullu Naalakkersuisoq, Karl Lyberth:
- Uannut pingaaruteqarpoq naqissusissallugu aalisarnermi sinaakkutissatut atugas-siissutaasut aalisarnermillu aqutsineq aqqutissiuussissammata nioqqutissiornermi suliareqqiisarnermillu unammillertoqarnissaanut. Aalisarnermi politikkip aqutsinerullu qulakkeeqataaffigissavaa fabrikkinut pilersuinerup aalaakkaasuunissaa kiisalu ukioq kaajallallugu aalisakkerivinni sulisut nikerarpallaannginnissaat.

Aningaasaqarnermut Nunamullu Namminermut Naalakkersuisoq, Vittus Qujaukitsoq:
- Aalisakkanik isumalluutitsinnik tamanik iluaquteqarneq siunissami ataatsimut isigalugu isumalluutinik iluaquteqarnermik ilusiliinikkut akitsuuserneqarsinnaassaaq. Ullumikkummi taamaallaat avataasiorlutik aalisartut angallatillu nammineerlutik tunisassiornissamut akuersissuteqarfigineqartut aalisakkanik isumalluutinik iluaquteqarsinnaanerminnut nunap karsianut akitsuutinik akiliisarmata. Sinerissamut qanittumi aalisarnermi killissarititaasutigut atugassarititaasut pitsaanerulersinnerisigut pissutsinullu naleqqussaanikkut isertitaqarnerulersinnaanissaq aqqutissiuunneqassaaq, soorluttaaq aamma siunissami aalisariutit ilarpassuinit taakkuninnga nunap karsianut taamatut isertitsisarnissaq qulakkeerneqarsinnaassasoq.

Ass. Royal Greenland A/S