Meeqqat illersuisuannut ataqqinninneq

 

Naalakkersuisup Nick Nielsen-ip maanna Meeqqat illersuisuata Aaja Chemnitz Larsen-ip suliai tapersersorlugit nalunaarpoq, Randi Broberg-ip Meeqqat illersuisuata suliaminik ingerlatsisinnaanera pillugu piginnaasaanik saassussinerata kingorna.

”Oqaaseqaat taanna nammineq akisussaaffigissavaa” Naalakkersuisoq Nick Nielsen oqarpoq, Randip Meeqqat Illersuisuannik saassussinerata kingorna, ingerlaqqillunilu: ”Aaja ersarilluinnartumik meeqqanut tunngasut ersarinnerulersinneqarnerannut peqataasimavoq. Uanga nammineq suliassaqarfimma iluani peqataatitsisarneq pillugu eqqarsaatinut tapersiinera nuannaarutigisimavara, aammali apeqqusiimmat ilinniartitsisunik immikkut ilinniagalinnik peqarnersugut eqqarsaatigalugu, taakkuami meeqqat atuarfianni peqataatitsinissamik eqqarsaatit iluatissappata nammattuusussaammata”.

Ilinniartitaaneq Meeqqat Illersuisuanniit isornartorsiorneqartut ilagisimavaat, ilaatigullu Ilulissani aammalu Narsami atuarfiit iluarsartuunneqarnissaat oqaatsinik sakkortuunik atuiffiusimapput, tamannalu peqataaqataavoq atuarfiit taakkua oqallinnerup kinguninngua matuneqarnerannut. ”Soorunami meeqqanut ajunngitsussaq aallaavigalugu periartarpugut, ilaannili sulineq sukkaappallaartarpoq, taamaattoqartillugu pitsaasuuvoq Meeqqanut Illersuisoqarnikkut nakkutilliisoqarnera” Nick Nielsen ingerlaqqilluni oqarpoq.

Randi Broberg-p apeqquserpaa Aaja-p meeqqanut tunngasumik suliat oqaluttuuffigisinnaanerani, meeqqat ataasiakkaat oqaloqatigisinnaanngikkunigit. ”Meeqqat Illersuisuata meeqqat soqutigisaat oqaluuserissavai, uangalu isumaqarpunga Aaja-ip tamanna pi-tsaalluinnartumik isumagigaa. Pingaaruteqarporlu eqqaamassallugu Meeqqat Illersuisuat kisimiilluni sulinngimmat, allattoqarfeqarlunili piginnaanilinnik sulisulimmik, assigiinngiiaartunik sammivilinnik ilinniagaqartunik. Tamannalumi aamma Naalakkersuisoqarfitsinniit iluaqutigisarsimavarput, assersuutigalugu MIO qaaqqusimavarput meeqqat atualernissaq sioqqullugu atugaat pillugit workshop-eqartitsinitsinni suleqatigiissitamut peqataatillugu, meeqqat atuarfiannut atatillugu iliuusissatut pilersaarusiornermi. Uanga Aaja-p Meeqqanut Oqaaseqartartutut akisussaaffimmik naammassinnissinnaassusia assut upperaara, taamaattumillu Randip oqaaseqaatai isumaqatiginagit”, Nick Nielsen naggasiivoq.

Naalakkersuisoqarfiup MIO-llu akornanni pitsaasumik suleqatigiittoqarnerata kingunerisimavaa Ilinniartitaanermut Naalakkersuisoqarfik meeqqat atuarfianni qanorpiaq atugaqartoqarneranik paasissutissinneqartarsinnaasimammat, soorluttaaq MIO-p Naalakkersuisoqarfik attavigisaraa meeqqat atuarfiinut ataasiakkaanut atatillugu ernumanartutut naliliisoqaraangat. Naalakkersuisoqarfiup MIO-miit saaffiginnissutit tamatigut pimoorullugit suliarisarpai, sukkasuumillu qisuariarfigisarlugit.