Ann Andresenimut nersornaat

Ilaqutariinnermut Inatsisunillu Atuutitsinermut Naalakkersuisup Martha Lund Olsenip nuannaarutigingaarlugu nalunaarutigaa, Uummannami Meeqqat Angerlarsimaffianni pisortaq Ann Andresen pingasunngorneq 20. november 2013 Ebbe Munckip Eqqaassutissaatut Aningaasaateqarfimmit nersornaammik tunineqarmat, nersorinnissutigineqarluni Ann Andresenip Uummannami Meeqqat Angerlarsimaffianni perorsaanermik annertuumik suliniuteqarsimanera.

Nersornaasiineq ualimut Christiansborgip illussaarsuani Danmarkimi pivoq, nersornaammik tunniussisuulluni ataqqinartorsuaq Dronning Margretha. Nersornaammik tunniussinermi Ann Andresen ”meeqqaminit” najorneqarpoq, taakkulu pingaartorsiornermi namminneq nipilersorlutik aliikkusersuisuupput.

-Namminersorlutik Oqartussat sinnerlugit tulluusimaarutigalugu tuppalliutigeqaara Ann Andresenip ukiorpassuarni meeqqanut ajunngitsussaq pillugu sulinerminik taamatut nersorniarneqarnera. Ann Andresenip perorsaasutut annertuumik suliaqarsimanermigut uppernarsarpaa pitsaassusilimmik allatut suleriaaseqarsinnaaneq akilersinnaasoq, naak meeqqat sullitattariaqakkat suliassartai alianartumik aallaaveqartaraluaqisut, Naalakkersuisoq Martha Lund Olsen taama oqaaseqarpoq.

Ebbe Munvkip Eqqaassutissaatut Aningaasaateqarfik 1974-imi pilersinneqarpoq, pilersitsisunut ilaalluni eqqartuussuserisoq Bernt Hjejle. Aningaasaateqarfiup siunertaraa tusagassiortup aallartitatullu sulisimasup Ebbe Munckip eqqaamaneqartuarnissaa, taassumami ilaatigut tusaamasaassutigaa Kalaallit Nunaanni Kalaallillu Nunaat pillugu ilisimatusarnermik soqutiginnittuunini.

Nersornaat siusinnerusukkut ilaatigut tunniunneqarsimavoq aaqqissuisuunermut Bo Lidegaardimut, Politikenimi aaqqissuisuunerusimasumut Herbert Pundikimut kiisalu nunanut allanut ministeriusimasumut Uffe Ellemann-Jensenimut.