Kinap nunattalu isumaqatigiinnerat

Aatsitassanik suliassaqarfimmi Kalaallit Nunaata Kinallu akornanni suleqatigiinnerup nukittorsarnissaanik Jens-Erik Kirkegaard aamma Kinami naalakkersuisut isumaqatigiittut

 

Inuussutissarsiornermut Aatsitassaqarnermullu Naalakkersuisoq Jens-Erik Kirkegaard aamma Kinami Nunamut Isumalluutinullu Ministeri Jiang Daming novembarip pingajuanni Tianjinimi ataatsimiinnerminni suliassaqarfinni arlalinni sakkortusisamik suleqatigiinnissaq isumaqatigiissutigaat.

Kinami niuerfimmi aatsitassanut tunngatillugu aningaasaliinermut tunisinermullu piviusutut aatsitassarsiornermik suliniutini kineserit peqataaqqullugit Jens-Erik qaaqqusivoq.

Kaammattuut ministerip Jiang Damingip tigulluagaa, taassumalu uppernarsarpaa nunatsinni aatsitassanik neriuuteqarfigisaasuni Kinami suliffeqarfiit aningaasaliinissaannut naalakkersuisut kaammattuuteqarniartut. Ministerit ataatsimiinnerat nangillugu suliffeqarfinni malitseqartitatut ataatsimiinnerit arlallit isumaqatigiissutigineqarput.

Aammattaaq pisortaasuni annertusisamik suleqatigiinnissamik illua’tungeriit isumaqatigiissuteqarnerannik ataatsimiinneq inerneqarpoq, ilanngullugu Inuussutissarsiornermut, Aatsitassaqarnermut Suliffeqarnermullu Naalakkersuisoqarfimmi Geologiimik immikkoortoqarfiup aamma Det Kinesiske Institut for Geologip akornanni geologiskimut tunngatillugu suleqatigiinnissamut tunngasumik Memorandum of Understandingimik (MoU-imik) isumaqatigiittoqarluni.

Suleqatigiinnissamik suliniutaasinnaasut akornanni geokemiskimik, biokemiskimik aamma silaannakkut geofysiskimik misissuinerit immikkut ittumik sammineqassapput.

Illua’tungeriit aamma sullissisarfiit pingaarutillit akornanni sulisunik taarseraassinnaanermut periarfissat oqaluuseraat.

- Ataatsimiinnerup assorsuaq iluarinartumik iluseqarnerata nunatsinni aatsitassarsiornermik suliniutini, nunatsinni aningaasaqarnermik nukittorsaaqataasussamik kineserit peqataanissaannik upperinnissusera nukittorsarsimavaa. Ingammik kineserit aatsitassarsiornermik suliffeqarfiisa nunatsinnilu aqutsisoqarfiup akornanni malitseqartitsilluni ataatsimiinnissanik isumaqatigiissuteqarsimanerput nuannaraara, taamaalilluni suliniutinut ataasiakkaanut tunngatillugu suleqatigiinneq tigussaasutut inissisimaffiusumi ingerlaqqissinnaassammat, Jens-Erik Kirkegaard oqarpoq.