Nunanut allanut aammalu illersornissamut politikki

Nunat Avannarliit Siunnersuisooqatigiivisa oqaluuserisassaanni ilaapput

Nunat Avannarliit Siunnersuisooqatigiivisa 65-saanik Oslo-mi katersuunneranni nunanut allanut illersornissamullu politikki pingasunngornermi 30. oktober ataatsimiinnermi oqaluuserisassaniippoq. Sverige-mi nunanut allanut ministerip Carl Bildt-ip nunat avannarliit nunani baltiskiusunut tunngasunut, Issittumi Siunnersuisooqatigiinni FN-milu nunat avannarliit nunanut allanut tunngasutigut suleqatigiinnerat pillugu nalunaarusiaq Nunat Avannarliit Siunnersuisooqatigiivinut saqqummiuppaa. Finlandi ukioq manna nunat avannarliit illersornissamut suleqatigiinneranni siulittaasuutitaqarpoq, Finlandimilu illersornissamut ministerip Carl Haglund-ip nunani avannarlerni naalakkersuisut ilinniartitaanermut, niuernermi pilersuinermilu aaqqissuinermi suleqatigiiffiit amerlasuut pillugit siunnersuisooqatigiinnut saqqummiussivoq.

Nunat avannarliit Siunnersuisooqatigiit oqallinnerisa Naalakkersuisut periarfissippai issittumi nalinginnaasumik sillimanissaq pillugu oqallinnermut ilanngussaqarnissaannut, Naalakkersuisunullu siulittaasup Aleqa Hammond-ip periarfissaq iluatsillugu ilaatigut atlantikup avannaani imaatigut sillimanissamut attuumassutillit oqaaseqarfigai.

Sammisaq tamanna aamma nunat avannarliit killiit nunanut allanut ministeriisa Nunallu avannarliit Killiit Siunnersuisooqatigiivisa siulittaasoqarfiata akornanni ataatsimiinnermi sammineqarpoq. Matumani isumaqatigiissutigineqarpoq issittumi suleqatigiinnermut atatillugu nunat avannarliit killiit pingaartillugit tulleriiaarini pillugit ataatsimut oqaluuserinninnissaq.

”Kalaallit nunaata atlantikullu avannaatungaata nunarsuup immikkoortortaat siunissami suli ullutsinni ilisimasatsinnit pimoorussinerusumik aaqqissuussaanerusumillu nakkutigineqarnissaat pisariaqartinneqalissaaq, tassami nunarsuup immikkoortortaani tamaani umiarsuartigut inuussutissarsiutitigullu samminninnerit annertusiartuinnarmata. Uagut tungitsinnut maluginiarsimavarput, Canada-p qaammataasianik atortoqarluni nakkutilliisalernissaq pilersaarutigigaa, uagulli tungitsinnit isigalugu nunat avannarliit ataatsimoorullugu timmisartunik inuttaqanngitsunik Drone-nik atortoqalersinnaanermut periarfissat aamma misissorneqarnissaat isumaqarfigaarput, Nunani Avannarlerni Killerni nunarsuup immikkoortortaani annertoqisumi nakkutilliisinnaasunik, imaatigut angallannermut isumalluutinillu atuinermut atatillugu. Tamanna ukioq manna Nunat Avannarliit Siunnersuisooqatigiivisa katersuunneranni oqaluuserissanngorlugu saqqummiussininnut tunngaviusoq”, Aleqa Hammond oqarpoq.