Steen Lynge Avannaanut tikeraalerpoq

Steen Lynge 1 Peqqissutsimut Attaveqarnermullu Naalakkersuisoq Steen Lynge oktoberip 28-anniit novemberip aallaqqaataanut Ilulissanut, Qeqertarsuarmut Aasiannullu tikeraassaaq.

Illoqarfinni taakkunani pingasuni tikeraarnermini Steen Lynge innuttaasunik ataatsimiisitsiniarpoq, peqqinnissaqarfimmut attaveqarnermullu tunngasuni politikkikkut anguniakkat pingaartitallu saqqummiutissallugit.

Innuttaasunik ataatsimiisitsinerit Naalakkersuisunut ilaasortat allat marluk, tassaasut Aningaasaqarnermut Nunamullu namminermut Naalakkersuisoq Vittus Qujaukitsoq, aamma Ilaqutariinnermut Inatsisinillu atortitsinermut Naalakkersuisoq Martha Lund Olsen, peqatigalugit ingerlanneqassapput.

Innuttaasunik ataatsimiisitsinerit saniatigut Steen Lyngep napparsimmavinni sulisut, Qeqertarsuarmi Pisiniarfimmut Siunnersuisoqatigiit kiisalu Qaasuitsup Kommuniani aqutsisut Ilulissani ataatsimeeqatigissavai.

Steen Lynge Ilulissaniinniarpoq 28. aamma 29. oktober. 30. oktober Qeqertarsualiassaaq. Angalanerlu Aasianni naggaserneqassaaq, oktoberip 31-anniit novemberip aallaqqaataanut Aasianniissalluni.