Utertitsinermut killiffik/ qinnuteqarnissamut kajumissaarut

Junimi Naalakkersuisut Aningaasanut ataatsimiititaliaq aqqutigalugu aalajangerpaat aalisarnermi akiliut 1.500 koruuniusoq atorunnaarsinneqassasoq, tamannalu jannuaarip aallaqqaataanut kingumoortumik atuutilissasasoq.

Oktoberip qeqqani ikittuunngitsut utertinneqarnikuupput. Aalajangiineq tusagassiorfiit aqqutigalugit nalunaarutigineqarpoq, kajumissaarullu aalisartunit ikittuunngitsunik atorluarneqarsimavoq.

Matumuunalu aalisartut allat ukiup affaani siullermi akiliuteqarsimasut qinnuteqaqqullugit kajumissaassavakka. Decemberip naanissaani 2013 utertitsinissaamut periarfissaq ammavoq.

Innersuutigissavaralu najuaqarfiup kommunip allaffia aqqutigalugu qinnuteqaat ingerlanneqassasoq. Aammalu erseqqissaatigilaassavara naalakkersuisoqarfimmi soorunami paasissutissat akuersissutinut tunngasut pigineqarmata, kisianni qinnuteqaammut bankimi konto suna atorneqassanersoq qinnuteqaammi ilannguttariaqartoq, paasissutissanik taamaattunik maani Nuummi pigisaqannginnatta.