Imigassaq ikiaroornartullu pillugit Siunnersuisoqatigiit siulittaasortaarput

Nive Heilmann Imigassaq ikiaroornartullu pillugit Siunnersuisoqatigiit inissitsiterfiusumik ulloq 18. oktober siunnersuisoqatigiit ataatsimiinneranni Nivé Heilmann siulittaasutut qinigaavoq.

Ukiorpassuarni siunnersuisoqatigiinni sulereerluni ilaasortaanerminit tunuarniuteqartoq Inuk Bourup-Nielsen Nivé Heilmannip kingoraarpaa. Uju Petersen siunnersuisoqatigiinni siulittaasup tulliatut qinigaaqqippoq.

-”Inuk Bourup-Nielsenip Imigassaq ikiaroornartullu pillugit Siunnersuisoqatigiinni ukiorpassuarni siulittaasutut annertuumik suliniuteqarsimaneranut qutsavigissavara. Siunnersuisoqatigiit siulittaasortaavat, Nivé Heilmann qinigaanerani pilluaqquara. Atornerluinermut tunngasut pillugit, uagut inuiaqatigiittut unammilligassatta annersaasa ilaattut isigisanni suleqatigiilluarnissaq neriuutigaara,” Peqqissutsimut Attaveqarnermullu Naalakkersuisoq, Steen Lynge oqarpoq.

Nivé Heilmann 1976-imi inunngorpoq meeqqanillu ilinniartitsisutut ilinniarsimalluni. 2012-imiilli iluarsartuullugu pilersaarusiami peqatigiiffimmi: ”Meeqqat Inuunerissut / Bedre Børneliv” siulittaasutut atorfeqarsimavoq. Saniatigut Kalaallit Røde Korsianni nuna tamakkerlugu siulersuisuni aamma ikiueqqaarnermut ataatsimiititaliami Nivé ilaasortaavoq. Nivé Heilmann meeqqat inuusuttullu sinniisuattut Imigassaq ikiaroornartullu pillugit Siunnersuisoqatigiinnut Peqqissutsimut Attaveqarnermullu Naalakkersuisumit, Steen Lyngemit toqqarneqarpoq.

Imigassaq ikiaroornartullu pillugit Siunnersuisoqatigiit Naalakkersuisunut siunnersuisutut atuuppoq. Siunnersuisoqatigiit atornerluinermut tunngasut iluanni ineriartorneq malittaraat aamma pitsaaliuineq, peqqinninerulersitsiniarneq, nakkutigineqarnera katsorsaanerlu pillugit siunnersuisuupput. Imigassaq ikiaroornartullu pillugit Siunnersuisoqatigiit aamma suliassaraat aanngajaarniutit atornerluinerlu pillugit tamanut ammasumik oqallinnermik pilersitsinniarnermut suleqataassallutik.

Imigassaq ikiaroornartullu pillugit Siunnersuisoqatigiit qulingiluanik ilaasortaqarput. Namminersorlutik Oqartussani naalakkersuisoqarfinni assigiinngitsuni, Politimestereqarfimmi aamma KANUKOKA-mi pineqartumi paasisimasalinnik Siunnersuisoqatigiit katitigaapput. Taakkua saniatigut meeqqat inuusuttullu sinniisui marluk aamma timersornermit sinniisoq ataaseq siunnersuisoqatigiinnut ilaapput.