Nick Nielsenip akissuteqaataa

Ukaliusami ilinniartitsisut 14-it allagaannut ammasunut Nick Nielsenip akissuteqaataa

Ukaliusami ilinniartitsisut 14-iusut suliffimminni atugarisatik pillugit naammagittaalliornertik allakkatigut ammasutigut ersersippaat. Ilinniartitsisut naammagittaalliuutaat ilaatigut ukuusut imatut eqikkarpakka: 1. Suliffimmi atugarisat pillugit tusaaniarneqannginneq, 2. angajoqqaanik suleqateqarnerup annikippallaarnera, 3. meeqqat sumiginnakkat immikkut iliuuseqarfigineqannginnerat, 4. immikkut pisariaqartitsisunut nukinnik atuivallaarneq, 5. kiisalu atuartitsinermi atuartut ingerlalluartut pilliutigineqartarnerat atuartut immikkut pisariaqartitsisut sumiginnarneqartullu peqataatinniarnerannut nukiit atorneqartarmata.

Siullermik oqaatigissavara ajornartorsiut 1-imik taaneqartoq pillugu IMAK, KANUKOKA aamma Naalakkersuisut suleqatigiillutik atuarfinni pissutsinik misissuiniarmata. Taanna misissuinissaq pilersaarusiorneqaleruttorpoq ukiumilu atuarfiusumi 2013/14-imi piviusunngortinneqassalluni. Qulaani misissuinermi ajornartorsiutit 2-miit 5-imut normulerneqarsimasut misissuinermi aamma ilaatinneqassapput.

Naalakkersuisut aamma anguniarpaat, ilaqutariit ingerlanerliulersimasut toqqissisimalernissaat anguniarlugu, siusinaartumik ikorfartorneqartalernissaat. Ikorfartuinermi suliniutit immikkut tulluussakkat aqqutigineqassapput tassanilu Ilaqutariinnermut Naalakkersuisoqarfik qanimut suleqatigalugu ingerlanneqassaaq.

Ilaqutariinni ajornartorsiutigineqalersimasut siusinaarluni sulinikkut aaqqinniartariaqartut Ukaliusami ilinniartitsisut oqarmata isumaqatigaakka. Tassami imaassanngilaq, ajornartorsiutit ilaqutariit iluini pilersartut aatsaat meeqqat atualernerisa kingornatigut aaqqiiviginiarneqartassasut. Aamma isumaqataavunga aaqqiiniarnermi ilinniartitsisut kisimik ilungersuuteqartassanngitsut. Tassami ilumoorpoq angajoqqaat akisussaaqataanerat eqqaamajuassallugu pingaaruteqarluinnarmat. Taamaattumik angajoqqaajugutta, perorsaasuugutta, ilinniartitsisuugutta, peqqissaasuugutta, inunnik isumaginnittuugutta politikeriuguttaluunniit tamatta pinngitsoqarata ilaqutariit ingerlanerliulersimasut nukittorsarniarlugit suleqatigiittariaqarpugut.

Meeqqat pingasunik aamma tallimanik ukiullit misissorneqartalissapput, taamaalilluni ilaqutariit iluini ajornartorsiutit kiisalu meeqqat immikkut pisariaqartitsisut siusissukkut paasineqartalernissaat angulertorneqassammat. Neriuutigaarput taamatut periuseqarnikkut atuarfinni ajornartorsiutinngortartut annikillisarneqarumaartut.

Qulaani taaneqartut suliniutit saniatigut Naalakkersuisut novembarip naalernerani meeqqat atuarfianni pissutsit pillugit isumasioqatigiisitsissapput. Isumasioqatigiinnermi anguneqartut Naalakkersuisut Ilinniartitaanermi Pilersaarusiassaannut ilanngunneqassapput. Ilinniartitaanermi Pilersaarusiassaq nutaaq 2014-imi Inatsisartut Upernaakkut ataatsimiinneranni Naalakkersuisut Inatsisartunut oqaluuserisassanngortissavaat.

Ilisimavara Ukaliusami ilinniartitsisut ilungersorlutik atuartut tamarmik ilikkagassaminnik angusaqarluarnissaat sulilluarnermikkut ilungersuuttuaraat. Meeqqat immikkut pisariaqartitsisut sulissunneqarneranni misilittakkasi isumasioqatigiinnermi ilanngutissallugit pisariaqarput. Taamaattumik misilittakkassi tusarnissaat immikkut qilanaaraara, siunissamilu atuartitsinerup inerisaqqinnissaani aaqqiiniarnernilu allani tunuliaqutaalluarnissaat qularinngilara.

Maanna angalavunga neriuutigaarali Nuummut uteriaruma pineqartut pillugit naapeqatigisinnaajumaarlusi.