Pinngortitalerinermik ilinniarnerit qanillipput

Kalaallit Nunaanni pinngortitalerinermik ilinniarnerit qanillipput

Kalaallit Nunaanni universitetimi biologimik ilinniarneq? Ullumikkut taamaaliortoqarsinnaanngilaq, ukiorpassuunngitsulli qaangiuppata piviusunngorsinnaavoq. Isumassarsiaq Kalaallit Nunaanni peqqissutsimik ilisimatusarnermik aamma annertusaasussaq Naalakkersuisut tapersersorpaat.

Kalaallit Nunaanni pinngortitalerinermik ilinniarnissamut aamma Peqqissutsimik ilisimatusarnissamut aningaasanut inatsimmi ingerlatsinissamut aningaasaliinissaq pillugu Naalakkersuisut tunngaviusumik aalajangeeqqammerput.

”Ingerlaqqilluni ilinniarnerit, ilisimatusarnerillu ataatsimut isigalugit sukkulluunniit nukittorsarneqarnissaat Naalakkersuisut siunertaraat. Kalaallit Nunaanni imminut napatittumi pinngortitalerinermik ilinniarsimasut pisariaqartinneqartorujussuupput, ilinniarnermillu Kalaallit Nunaanni pilersitsinermi ilinniartut amerlanerulernissaat tamassumalu kingorna Kalaallit Nunaanniiginnarnissaat ilimagineqarpoq. Kalaallit Nunaanni peqqissutsimik ilisimatusarnerup annertuup Kalaallit Nunaanni ingerlanneqartup maanngaanniit aallaaveqarnissaa Peqqissutsimik ilisimatusarnermut aningaasaliinikkut Naalakkersuisut aammattaaq qulakkeerniarpaat. Kalaallit Nunaanni Kalaallillu Nunaannut annertunerusumik ilisimatusartoqartillugu Kalaallit Nunaanni aalajangiisartut aalajangiinissamik pitsaasumik tunngavissaqarnissaat anguneqassaaq”, Ilinniartitaanermut Ilisimatusarnermullu Naalakkersuisoq Nick Nielsen oqarpoq.
Tunngavissiisoqarpoq
Ilinniarneq nunanut tamanut tunngassuteqassaaq aammalu Artekimi periuseq malillugu pilersinneqarnissaa eqqarsaataalluni, tassani Pinngortitaleriffiup Aarhus Universitet aamma University of Manitoba Canadamiittoq suleqatigai. Pinngortitalerinerup aamma Peqqissutsimik ilisimatusarnerup illumi ataatsimi imminnut ataneri Ilisimatusarfik aamma Pinngortitaleriffik qiteralugit ilinniartitaanermi ilisimatusarnermilu nutaaliortitsissapput.

Illup atortorissaarutillip ineriartorneq tapersissavaa, tassani Kalaallit Nunaanni peqqissutsimik ilisimatusarnermi Kalaallit Nunaanni ilisimasaqaleriartulernissamut iluaqutaasumik ph.d-ngorniat maani ingerlatsilersinnaalissapput suliniutinullu aningaasaliisoqarsinnaalissalluni. Innuttaasut peqqissusaat, nerisaqarneq avatangiisillu sammisaapput pingaaruteqartut aammalu inuiaqatigiinnik, peqqissutsimik, pinngortitamik avatangiisinillu ilisimatusarluni misissuinerit akornanni peqatigiinneq siuarsassallugu.

Suliniut Pinngortitaleriffimmi siulersuisuinit saqqummiunneqarpoq, Pinngortitaleriffiullu illup nutaap 2015-imi piareernissaa siunertaralugu aningaasaateqarfinnut aningaasanik maannakut qinnuteqarpoq.