Martha Lund Olsen-ip isumaginninnikkut sullissisut naapippai

Martha Lund Olsen

Martha Lund Olsen-ip Qaasuitsup Kommuniani isumaginninnikkut sullissisut naapippai

 

Ilaqutariinnermut Inatsisinillu Atuutitsinermut Naalakkersuisup Martha Lund Olsen-ip maannakkorpiaq Sisimiuni, Ilulissani, Qeqertarsuarmi Aasiannilu angalanini naamassiliivippaa. Taamatut angalernermini Naalakkersuisup isumaginninnikkut ingerlatsiveqarfiit, kommunit sinniisaat aammalu immikkut ilisimasallit naapinneqartarsimapput, tamatumali saniatigut innuttaasunik naapitsinissaminut ilaatigut innuttaasunik ataatsimiititsinerit aqqutigalugit naapittisarsimalluni.

Ilulissani, Qeqertarsuarmi Aasiannilu ataatsimiittitsinnginnerni Ilaqutariinnermut Inatsisinillu Atuutitsinermut Naalakkersuisup periarfissaqarfigisimavaa isumaginninnikkut sullissisunik ataatsimeeqqateqartarnissaminut. Martha Lund Olsen-ip oqaatigivaa: ”Assorsuaq nukittuallannarsimavoq iluaqutaassallunilu isumaginninnikkut sullissisut qanimut oqaloqatiginissaat, tamatumanilu suliniutigineqartussatut paaseqatigiissutigineqarsimalluni Ilaqutariinnik Sullissiviit piorsaavigineqarnissaat, tamatumuunalu aqqutissiuunniarneqassalluni meeqqat angerlarsimaffiit avataannut inissinneqartartut ikilisarniarneqarnissaat. Piffinnit tamanit tarnikkut anniaateqartut sullinneqartarnerisa ineriartortinneqarnerat iluarisimaarneqarluni oqariartuutigineqartarsimavoq, taakkumi atoqatigiinnikkut innarlerneqarsimasut katsorsarneqartarnissaat isumagisussaammassuk. Innuttaasut ataatsimiittinneqarnerini utoqqalinersiuteqartitsisarnerup kommunillu innarluutillit pillugit suliniuteqarnissaanut tunngaviginiarneqartut iluarisimaarneqartarsimapput, tamatumanilu ilanngullugu nunatsinni innarluutillit Sisimiuni sullinneqarfissaat iluarusuutigineqartarluni. Taamaasillunimi innarluutillit qanorluunniit ukioqaraluarunik timip atornissaanut sungiusartinneqartarsinnaanissaat periarfissiissutigineqassammat.