London Mining atsioqatigiinneq

Underskrivning af aftale

”Kalaallit Nunaata oqaluttuarisaanerani pisoqarpoq”, oqarpoq Inuussutissarsiornermut, Aatsitassaqarnermut Suliffeqarnermullu Naalakkersuisoq, ullumi London Mining-imeersut ataatsimooqatigalugit isumaqatigiissummik atsiorami, London Mining-ip Isukasiani saviminissaqarfimmi piiaanissamut akuersissummik pissarsineranik kinguneqartumik.

”Kalaallit Nunaanni inuussutissarsiornermi suliassat ulloq manna tikillugu annertunerpaartaasa piviusunngortinnissaanut Naalakkersuisut iluatsitsilluarmata tulluusimaarutigisorujussuuara. Suliffissaqartitsiniarnermut aamma nunap karsianut isertitassanut pitsaalluinnartup tungaanut sunniuteqassasoq qularutissaanngilluinnarpoq”, isumaqarpoq iluarisimaarinnilluni Jens-Erik Kirkegaard, inuussutissarsiornermut aatsitassaqarnermullu naalakkersuisoq, aammalu sanaartornermut immikkoortumi inuit 3.000-it pallillugit – aammalu ingerlatsinermut immikkoortumi inuit 750-ngajalluinnaat suliffissaqartinneqassasut naatsorsuutigineqartoq ilisimatitsissutigalugu.

Inuiaqatigiinni siamasissorujussuarmiittuni inuussutissarsiornermi suliassanut allanut sanilliullugu inuit taakkua amerlasoorujussuupput.

Inuussutissarsiornermut, Aatsitassaqarnermut Suliffeqarnermullu Naalakkersuisup oqarnera malillugu ullumikkut isumaqatigiissummik atsioqatigiilluni tamaanga killinnissaq tikillugu suliap ingerlanera sivisoorujussuusimavoq. Namminersorlutik Oqartussat ukiunit qulinit amerlanerusuni nunatut aatsitassarsiorfiusutut inissisimalernissamik ilungersuuteqarneq annertusarsimavaat. Aammalu matumani isumaqatigiissuteqarnermi tamatuma tungaanut alloriarneq siulliuvoq annertoorujussuaq. Tamaanga killinnissamut suliaqarneq imaannaasimanngilaq.

”Suliap ingerlanerani tassani pissanganartumi piffissap ingerlanerani peqataasimasut tamaasa nersualaarusuppakka. Atorfilittani – kisiannili aamma London Mining-imi, pilersitsiviulluartumik isumaqatigiissutip piviusunngornissaanut ikiuussimasunut, tamannalu qujassutigaara”, oqarpoq Jens-Erik Kirkegaard.

Isumaqatigiissut aamma ataasiinnaanngitsumik oqaluttuarisaanermut tunngassuteqarpoq. Isumaqatigiissut royalty-mut ilusiliamik ilaqarpoq, tamannalu Naalakkersuisut pingaartittorujussuuvaat.

”Naalakkersuisut tamaasa sinnerlugit nuannaarutigaara kissaatigisarput annertoorujussuaq angugatsigu: royalty-mut ilusiliamik atuutsitsilernissaq”, oqarpoq nuannaarluni Jens-Erik Kirkegaard.

Immikkoortup tullia tassaavoq IBA-mut isumaqatigiissutip naammassillugu isumaqatiginninniutigineqarnissaa. Isumaqatigiissut suliffeqarfiit kalaallinit pigineqartut peqataanissaannut, nunaqavissunik sulisoqarnissamut aammalu naligiissitaanerup eqqarsaatigineqarnissaanut, ilinniartunut sungiusarfissanut, sungiusaanissamut aamma piginnaanngorsaanissamut/piginnaasanik qaffassaanissamut sulisunillu ineriartortitsinissamut siunnerfinnik arlalinnik aalajangersaaqataassaaq.

”IBA-mut isumaqatigiissut isumaqatigiissutaavoq pingaaruteqartorujussuaq, pissutigalugu suliassap inuiaqatigiinni minnerunngitsumillu najukkami innuttaasunut neriulluarnartumik inissisimalernissaanut qulakkeereqataasussaagami”, nassuiaavoq Inuussutissarsiornermut, Aatsitassaqarnermut Suliffeqarnermullu Naalakkersuisoq.

Akuersissutip taassuma tigummiarnerani London Mining avataaniit aningaasalersuisussarsiornissamut aammalu nunanit allanit saviminissamik pisisussarsiornissamut tunngavissaqarlualissaaq.

Oqaluagiaat uani atuarneqarsinnaavoq.