Suleqatigiinnissamik isumaqatigiissut

Great Greenland logo

Great Greenland A/S aamma Kopenhagen Fur qanimut suleqatigiinnissamik ullumi isumaqatigiissuteqarput

Ukioq kingullerli puisit amiisa Kalaallit Nunaanneersut imminut napatittutut ”takoqqusaarutigineqarnissaat” pillugu siunnerfilimmik paasititsiniaallutik Great Greenland A/S aamma Kopenhagen Fur suleqatigiilerput.

Isumaqatigiissut manna aqqutigalugu amernik tunisaqarnerulernissaq siunertaralugu suleqatigiinnissamik pilerisaarisarnissamillu isumaqatigiissuteqarnikkut suleqatigiinneq annertusarneqarpoq. Great Greenlandimut tamanna isumaqarpoq, puisit amiisa Kalaallit Nunaanneersut Kopenhagen Fur niuerfimmi ilisimasaqarnerpaatut siuttoralugu nunarsuarmi akitsorteriffiit pitsaanersaanni tunineqarsinnaanerat. Neriuutaavoq puisit amiinik tunisaqarnerulernissaq aamma Great Greenlandip tunisassiaasa pitsaasut ilisimaneqarnerulernissaat.

Piffissaq ungasinnerusoq isigalugu tamanna kalaallit piniartut puisit amiinik niueruteqarnissaannut kaaviaartitsinissaannullu annertusaassaaq. Aammattaaq neriuutaavoq, puisit amiinik naatsorsuutigisatut tunisaqarnerulernikkut Great Greenlandip akilersinnaasumik imminullu napatissinnaasumik suliaqaqqilernissaa.
Kopenhagen Furip ukiut arlallit ingerlanerisigut uppernarsarpaa, amernik assigiinngitsorpassuarnik akitsorterisarneq aqqutigalugu nunat tamat akornanni amernik tuniniaasartutut nukittunini siuttuuninilu.

Naalakkersuisut qanimut suleqatigiinnissaq taanna tapersersorpaat neriuutigalugu, puisit amiisa siunissami imminut akilersinnaasumik assigiinngitsorpassuartigut tunisassiarineqarnissaat katersaatigineqartarnissaallu, tassa puisip amiata ”takoqqusaarutigineqarneratalu” pissusissamisut pineqarnissaat malillugu.

Naalakkersuisut Siulittaasuat, Aleqa Hammond:
- Taamaammat Kopenhagen Fur arlalitsigut Kalaallit Nunaannut suleqatissatsialaavoq.