Tusagassiorfinnut qaaqqusissut

– Climate Greenland-ip atulersinneqarnissaa

3. oktober 2013-imi Ineqarnermut, Pinngortitamut Avatangiisinullu Naalakkersuisup Miiti Lynge-p Climategreenland.gl nutaaq – Kalaallit Nunaanni silap pissusiata allannguutai pillugit Namminersorlutik Oqartussat nittartagaat – atulersissavaa.

Climate Greenland nal. 9.00 Nuummi Ilinniarnertuunngorniarfimmi atulersinneqassaaq, taamaattumillu illit atulersitsinermi peqataanissamut imaluunniit suliffinni aaqqissuisoqarfimmeersumik peqataatitsinissamut qaaqqusivugut, tassani Naalakkersuisoq aamma ilinniartunit, ilinniartitsisunit tusagassiorfinnillu takkuttunit nittartagaq pillugu apeqqutinik akissuteqartartussaammat.

Climate Greenland sunaana?

Climate Greenland isaariaavoq, Kalaallit Nunaanni silap pissusiata allannguutai pillugit paasissutissanut ilisimasanullu ataatsimut iserfissiaasoq. Tassani silap pissusiata allannguutai assigiinngitsorpassuarnik aallaaveqarluni sammineqarput, aammalu pulaartut sullissivinnut suliniutinullu amerlasuunut innersuunneqartunut paasissutissanik amerlanerusunik ujarlernissamut isumassarsiortinnissaat siunertarineqarluni. Iserfissiaq kalaallisut, danskisut tuluttullu suliaavoq, aammalu Kalaallit Nunaanni nunanilu allani inuit tamat sullinniarneqarlutik.

Ineqarnermut, Pinngortitamut Avatangiisinullu Naalakkersuisoq Miiti Lynge oqarpoq, ”Climategreenland sulianut sullissivinnullu, Kalaallit Nunaanni silap pissusianik sammisaqarfiusunut ataatsimoortitseqataavoq paasisaqartitsiviullunilu. Neriuppunga nittartagaq atuarfinnit, tusagassiortunit allanillu, Kalaallit Nunaanni silap pissusiata allannguutaasa sunniutai pillugit annertunerusumik paasisaqarnissamut alapernaassinnaasunut sakkussatut atorneqarsinnaassasoq. Oqaatsit paasiuminartut atorlugit allataavoq, aammalu sammisanut immikkut soqutigineqarsinnaasunut itisiliinissamut periarfissaqarfiulluarluni. Nittartagaq ullumikkut ilisaritissinnaagakku nuannaarutigaara, aammalu ilinniartitsinermut iluaqutigineqarfigisinnaasaminullu allanut atorneqarnissaata takunissaa qilanaaraara.”

Climategreenland.gl 2009-mili atorsimavoq, aallaqqaammullu 2009-mi decembarimi Københavnimi FN-ip silap pissusia pillugu ataatsimeersuarnissaanut piareersaanermut atatillugu atulersinneqarluni. Nittartagaq maanna nutaamik ilusilerlugu nutartikkanillu imalerlugu Naalakkersuisunit atulersinneqarpoq.

Nittartagaq nutaaq qulequttanut pingaarnernut sisamanut aggorneqarpoq, tassalu ’Silap pissusia pillugu ilisimatusarneq’, ’Aniatitsineq annikillititsinerlu’, ’Silap pissusianut naleqqussarneq’ aamma ’Nunani tamalaani suleqatigiinneq’, tassanilu silap pissusiata allannguutaasa Kalaallit Nunaannut unammilligassarititai periarfissarititaalu ataatsikkut sammineqarput.

Nittartagaq uunga alakkarsinnaavat: www.climategreenland.gl

Apeqqutissaqarnermi attaveqarfissaq: Karen Anne Arleth, tlf.: 34 54 65, email: knar@nanoq.gl.