Akeqanngitsumik utaqqineq

SNOM320

Oqarasuaatikkut nakorsiarnissamut akeqanngitsumik inniminniisoqarsinnaanngorpoq

Innuttaasut nakorsamut oqarasuaatikkut inniminniiniartillugit akeqanngitsumik utaqqisarnissaannik suliaq aallartinneqarsinnaanngorlugu Naalakkersuisut aggustimi akuersipput. Ataasinngornermi 21. oktober suliniut nutaaq nuna tamakkerlugu atuutilissaaq, innuttaasullu siunissami nakorsamut inniminniiniartillutik Peqqinnissaqarfik oqarasuaatit normui nutaat atorlugit saaffigisalissavaat.

- ”Nakorsap oqarasuaataanut saaffiginninniartoqartillugu akeqanngitsumik utaqqisarnissaq suliniuteqarfiuvoq suleqatigiinnissamik isumaqatigiissummiittoq, nuannaarutigeqaaralu suliniut tamanna maanna atorneqarsinnaalissammat. Suliniut TELE-POST suleqatigalugu piviusunngortinneqartoq innuttaasut Peqqinnissaqarfimmut naligiinnerusumik saaffiginnittalernissaannut ammaassivoq", taama oqarpoq Peqqissutsimut Attaveqarnermullu Naalakkersuisoq Steen Lynge.

Suliniummut nutaamut atatillugu Peqqinnissaqarfiup oqarasuaatai nutaanik normoqalissapput tamarmik 80-imik aallartittunik. Innuttaasut normunut taakkununnga inniminniisarfiit ammaneranni akeqanngitsumik attaveqarsinnaalissapput. Piffissami inniminniisarfiup matoqqanerani akeqanngitsumik attaveqartarfimmut attaveqartoqarniarpat innuttaasut oqarasuaammit nammineerluni akisartumit akineqassapput, taamaalillunilu innuttaasoq napparsimmavimmi imaluunniit peqqissaavimmi pineqartumi pingaarnertut normu aqqutigalugu peqqinnissaqarfimmut saaffiginneqquneqassaaq.

Nakorsamut oqarasuaammut attaveqarniarninni siunissami normu sorleq atortassanerit maannangaaq takusinnaalereerpat Peqqinnissaqarfiup nittartagaani Peqqik.gl-imi. Aamma normua paasiniarsinnaavat najukkanni peqqissaavimmut saaffiginnillutit.

Piffissami aggersumi oqarasuaatit normui nutaat tusagassiorfiit assigiinngitsut aqqutigalugit tamanut nalunaarutigineqarumaarputtaaq.

Suliniutigineqartoq nutaaq Peqqinnissaqarfiup TELE-POST-illu suleqatigiinnerisigut aningaasalersorneqassaaq.