Arctic Circle Conference

Kalaallit Nunaata Reykjavikimi Arctic Circle Conferencemi peqataanera aamma Islandip præsidentianik Singaporillu nunanut allanut ministerianik ataatsimeeqateqarnera.

Naalakkersuisut siulittaasuat Reykjavikimi 12.-14. oktobarimi Arctic Circle Conferencemi pingaarnertut oqalugiarluni peqataavoq. Aleqa Hammondip Arctic Circle Conferencep ammarneqarnerani oqalugiarnermini silaannaap pissusiata allanngoriartorneranik 2015-imilu pimoorussamik nunarsuarmi silaannaap pissusiata illersugaanissaat pillugu isumaqatigiissusiornissamut pingaartumillu nunap issittup avatangiisianut tunngasoq ilasilluarneqarpoq Kalaallit Nunaatalu peqataanera oqariartuutaalu annertuumik tusagassiorfinni ilassineqarluarluni.

Aleqa Hammondip Arctic Circle Conferencemi peqataanerminut atatillugu, aammattaaq Islandip præsidentianik Òlafur Ragnar Grímssonimik, nunanut allanut ministerimik Gunnar Bragi Sveinssonimik Singaporimilu nunanut allanut ministereqarfimmi Senior Parliamentary Secretarymik (ministerip tullersortaanik) ataatsimeeqateqarpoq.

Naalakkersuisut siulittaasuata Islandillu præsidentiata akornanni ataatsimeeqatigiinnermi Kalaallit Nunaata Arctic Circle-mi peqataanera oqallisigineqarpoq. Arctic Circle-mi ataatsimeersuarnermi nunani issittuni pisariaqartumik akuunermi pissutsini pingaaruteqartuni anguniagaasut tamarmiusut isumannaarneqarnissaat isumaqatigiissutigineqarpoq. Aalajangiisarnermi periaatsit atuuttut nukittorsarneqarnissaannut ataatsimeersuarneq ilapittuutaasinnaavoq – pingaartumik Issittumi Siunnersuisooqatigiinni. Maanna Islandip Kalaallit Nunaatalu peqatigiillutik naapeqatigiittarnermi 2014-imi sammisassanut Kalaallit Nunaata siunissami qanoq inissisimanissaa misissuiffigissavaat.

Naalakkersuisut siulittaasuata Islandillu nunanut allanut ministeriata akornanni ataatsimeeqatigiinnermi ukiuni tulliuttuni Islandip Kalaallit Nunaatalu akornanni pissutsit qanoq ikkumaarnerisa nukittorsarneqarnissaat oqallisigineqarpoq. Pingaartumik Islandip Nuummi 8. novembarimi Islandip generalkonsulatimik ammaanissaanut atatillugu, tamatumani nunanut allanut ministeri peqataanissaminik pilersaaruteqarmat, isumaqatigiissutigineqarpoq suliassaqarfinni peqqinnissaqarfimmi, ilinniartitaanermi, kulturimi niuernermilu attaveqaatit immikkut nukittorsarneqarnissaannut iliuuseqartoqassasoq. Naalakkersuinikkut apeqqutit, taamatuttaaq uranimut akuutissanullu allanut isumaqataanngilluinnarnissap atuukkunnaarsinneqarnissaa, aalisakkat nuttartartut nakkutilliivigineqartarnissaat kiisalu nunani issittuni avataasiorluni aalisartarneq oqallisigineqarputtaaq.

Singaporemi nunanut allanut ministereqarfimmi Senior Parliamentary Secretarymik (ministerip tullersortaanik) ataatsimeeqateqarnermi, maajimi 2013-imi Singaporep Issittumi Siunnersuisooqatigiinni alaatsinaatsutut ilanngunneqarnissaa oqallisigineqarpoq. Tamanna tunngavigalugu qanimut suleqatigiinnerunissamut tunngaviusussatut periarfissat isumaqatigiissutigineqarput, aammattaaq Singaporemik, tamatumani suliassaqarfinni Singapore pisariaqartumik immikkut ilisimasaqarfigisaanni.