Matusisoqarnani ineriartorneq pillugu suleqatigiittoqassaaq

Aningaasaqarnermut Nunamullu Namminermut Naalakkersuisoq Vittus Qujaukitsoq ulluni kingullerni Qeqertamut, Saqqamut, Oqaatsunut Ilimanamullu tikeraarpoq. Inoqarfiit mikinerusut piorsarneqarnissaat pillugu isumasioqatigiisitsinerup kingunerisaanik tikeraarneq pivoq, tassanilu Naalakkersuisut angusaat iliuuseqarfiginiagaallu oqaluuserineqarput, aammalu innuttaasut siunnersuutaat kissaataallu oqaluuserineqarlutik.

Innuttaasunik ataatsimeeqatigiisitsinermi aalisarneq, ineqarnermi atukkat, meeqqat atuarfiat aammalu innuttaasunik kiffartuussineq uteqattaartumik sammineqarput. Innuttaasut nunaqarfinni suliffissaaleqineq ernummatigaat. Nunaqarfiit pillugit nuna tamakkerlugu maajimi 2014-mi ataatsimeersuartinneqarneranni innuttaasut akuunerutinneqarnissartik naammagisimaarpaat.

Vittus Qujaukitsoq:
- Qeqertarsuup Tunuani innuttaasut naapinnerat nuannaarutigilluinnarpara. Innuttaasut amerlasuut tikitani tamani ataatsimeeqatigineqarput, aammalu malunnarpoq Naalakkersuisut sulinerannut akuulluartut. Ersarissorujussuuvoq nunaqarfinni innuttaasut inuiaqatigiit ineriartortinneqarneranni akulerusimallutik peqataarusuttut, aammalu periarfissanik nutaanik pilersitseqataarusuttut.

- Tamanna pillugu suleqatigiinnissarput isumaqatigiissutigaarput. Ineriartorneq qulakkeerniarlugu sulilu sakkortunerusunngortinniarlugu innuttaasut inassuteqaataat amerlasuut pissanganartorpassuit soqutigalugit Naalakkersuisut tusarnaarpaat. Taamaattumik nunaqarfiit nammineersinnaanerisa annertunerulernissaat pisariaqarluinnarpoq, tamannalu suleqatigiinnikkut qulakkeerneqartariaqarpoq.

Vittus Qujaukitsoq Peqqinnissamut Attaveqarnermullu Naalakkersuisoq Steen Lynge aamma Ilaqutariinnermut Inatsisinillu Atortitsinermut Naalakkersuisoq Martha Lund Olsen peqatigalugu Ilulissani innuttaasunik ataatsimiititsissaaq marlunngornerup unnukkuani.

Vittus Qujaukitsoq ulluni tulliuttuni Qeqertarsuarmut, Kangerlummut Aasiannullu tikeraassaaq innuttaasunik ataatsimiititsilluni. Qasiginnguit, Ikamiut, Akunnaaq Kitsissuarsuillu piffissaq alla tikinneqarumaarput.