Kujataani 2013-imi saarullinniarneq pillugu

 

26. september 2013-imi ataatsimiinnermi Kujataani saarullinniarnissamik qinnuteqaatit marluk akueriniarlugit Naalakkersuisut aalajangerput. 

Qinnuteqaatip aappaa misiliilluni 1.000 tonsinik saarullinniarnissaq Kujataani Kitsissut qeqertaasa eqqaannut tunngavoq. Imartaq aalisarfiusussaq ilanngussami takuneqarsinnaavoq. Pinngortitaleriffik suleqatigilluinnarlugu ningittagarsorluni misileraalluni aalisartoqassaaq. 1.000 tonsit pineqartut Kalaallit Nunaanni nunami suliffissuarnut tulaanneqartassapput. Qinnuteqartoq tassaavoq Arctic Prime Fisheries ApS, ingerlatseqatigiiffillu pineqartup qinnuteqaataata akuerineqarneranik nalunaarfigineqarpoq.

Naalakkersuisut taassuma saniatigut aalajangerput ingerlatseqatigiiffiup taassuma avataasiorluni misileraalluni saarullinnik 1.500 tonsinik aalisarnissamut qinnuteqaataa akueriniarlugu. Arctic Prime Fisheries ApS Kujataani kisiartaalluni avataasiorluni saarullinniartuuvoq. Sinerissap qanittuani saarullittassat amerlasuut suli aalisarneqarsimanngimmata Naalakkersuisut immikkut ittumik aalajangerput sinerissap qanittuani saarullittassat 1.500 tonsit avataasiortunut nuunniarlugit. Pisassiissutit ningittagarsorluni aalisariutinit marlunnit aalisarneqassapput.

1.500 tonsit pineqartut Kalaallit Nunaanni nunami suliffissuarnut tulaanneqartassapput, ingerlatseqatigiiffiup Kujataani suliffissuaataanni ukioq naallugu inuit 40-t sulisinneqarsinnaasasut naatsorsuutigineqarpoq. Qinnuteqaatip akuerineqarneranik Arctic Prime Fisheries ApS nalunaarfigineqarpoq. 

 

Inussiarnersumik inuulluaqqusillunga

Karl Lyberth

 

Aalisarfiup assiliornera takuuk.

 

Apeqqutissaqartoqarpat Aalisarnermut, Piniarnermut Nunalerinermullu Naalakkersuisoqarfik attavigineqarsinnaavoq uunga: 34 50 00 imaluunniit e mail: apnn@nanoq.gl