Qissartoq

Qissartoq

Nunatsinni suliffeqarfiit arlallit it aamma digitalinngorsaaneq pillugit ilisimasanik misilittakkanillu avitseqatigiittarnissamut ataatsimoortarfissamik piffissami sivisuumi ujartuisimapput. Tamanna peqatigiiffimmik pilersinneqaqqammersumik taaguuserneqartumik Qissartoq malitseqarpoq.

Qissartoq isumaqarpoq ”qissartoq”, tassaasoq nigalik qimmit qimuttut pituutaannik ataatsimoortitsisartoq. Qissartoq taamatuttaaq nunarput ataatsimoortinnissaanik aammalu nunatsinni kattuffiit akimorlugit attaveqaqatigiissitsinissamik siunertaqarpoq, tassani apeqqutaanani tamakkiisumik ilaannaasumilluunniit Namminersorlutik Oqartussanit pigineqarnersut, namminersortuunersut imaluunniit kommuninit pigineqarnersut. Ilisimasanik avitseqatigiinnerup aamma misilittakkanik paarlaasseqatigiinnerit suliassaqarfiit Inunnut, Suliap Ingerlanerinut aamma Tunisassianut (qallunaatut Personer, Processer og Produkter – P-it pingasut) tunngassuteqartut iluanni ineriartortitsinissamut siuariartortitsinissamullu tunngavissaliissapput.

Sapaatit akunnerat 47-imi Qissartoq ilaasortanik ilaasortanngorusuttunullu saqqummiinernut pissanganartorpassuarnut ataatsimiititsinissamut qaaqquneqassapput. Peqataasut ilaatigut suliakkiisarnernut periusissat, periusissatigut suleqatigiinnerit, suliap ingerlanerisa pitsanngorsarnissaat, Enterprise Ressource Planning aamma digitalinngorsaaneq pillugit pissarsiaqarsinnaassapput isumasioqatissarsisinnaassallutillu. Tamatigut ataatsimoorluta isumalluutitsinnik misilittakkatsinnillu atorluaaqatigiikkutta pikkorinnerulersinnaasugut aallaaviusassaaq.

 

Kalaallit Nunaata nukittuffii

Kalaallit Nunaat peqatigiiffimmut Qissartumut tunngatillugu annertuumik iluaqutissarsisinnaavoq. Kalaallit Nunaanni kattuffiit amerlavallaanngillat, tamatumalu kikkut tamarmik oqaloqatigiinnikkut katersortinnissaat ajornarpallaarunnaarsippaa. Tamanna nukittoqutaavoq Qissartumi suliniuteqartut eqqumaffigilluinnagaat, aammalu suleqatigiilluarnissamut killissalersuinermi atorluarniagaat.

 

Pisariaqartitsisoqartoq paasinarsigaangat suliniutit aallartinneqartassapput

Aaqqissuussaanerit akimorlugit suliaqarneq aallartereerpoq. Soqutigisaqaqatigiit AEAGC, suliakkiissutinik ilusilersuinermik aamma suliniutinut aqutsisooqatigiinnik suliaqartut, DPL, marluullutik najukkami suliniuteqarnikkut pisariaqartitsisoqarneratigullu pilersinneqarput. Suleqatigiit maannamut aalajangersimasuunngitsumik ilaasortat namminneq kattuffiinut atassuteqarput, kisianni ”iluameertumik najugassaqarsimanatik”. Qissartoq pilersinneqarnerani soqutigisaqaqatigiit maannakkut arlalinnik nukissaqarlutik kattuffiit ataanni kattuffeqalernissamik neqeroorfigineqarput. Aammattaaq tunngaviusumik isumassarsiaavoq pisariaqartinneqalernerini amerlanerusunik soqutigisaqaqatigiinnik pilersoqassasoq. Taannarpiaavoq peqatigiiffiup pilersinneqarnerani eqqarsaataasoq; suliniutit aallartinneqassasut, pissutigalugu pisariaqartinneqarmata.