Erseqqissaat

Uranimut akuersaanngivinnerup atorunnaarsinneqarnerata aatsitassanik qaqutigoortunik atuinissamut aqqutissiuutissavaatigut.

Kalaallit Nunaanni niuerutigineqarsinnaasunik uraneqarnera aatsitassanut qaqutigoortunut attuumassuteqarpoq.

Naalakkersuisut Siulittaasuata Arctic Circlemi 12. oktober 2013 ammaalluni oqalugiaataanut erseqqissaassut.

Ullumi sermitsiaq.agmi Arctic Circlep ataatsimiinneranit, siullermeerluni Reykjavikimi ulluni makkunani 12. 14. oktoberimi ingerlanneqartumit ilanngutassiisoqarpoq.

www.sermitsiaq.ag internetikkut ilanngutassiivoq qulequtalerlugu, ”Aleqa uranimik tuniniaanialerpoq:

”- Siunissami qaninnermi Kalaallit Nunaat nunarsuarmi uranimik avammut tunisassiortut qulit akornanniilissaaq. Taama Naalakkersuisut Siulittaasuat Aleqa Hammond oqarpoq”.

Erseqqissarneqassaaq, uranimik akuersaanngivinnerup atorunnaarsinneqarniarnerani Naalakkersuisut anguniagarimmassuk, nunatsinni aatsitassanik qaqutigoortorujussuarnik atuinissap aqqutissiuunneqarnissaa.

Kalaallit Nunaanni uranimut niuerutigineqarsinnaasumut ilisimaneqartumut tunngatillugu, uani pineqartoq tassaavoq urani tassaammat aatsitassanik qaqutigoortunik qalluinermut atatillugu qaqinneqartartoq, tamannalu tassaavoq Naalakkersuisut uranimik akuersaanngivinnerup atorunnaarsinneqarniarnerani tunaartarisaat.

Uranimik akuersaanngivinneq atorunnaarsinneqassappat, malittarisassat periusissallu annertuut suliarineqaqqaartariaqarput, taamaasilluni urani sillimaniarnikkut isumannanngitsumik nunanillu allanik isumaqatigiissutit, uranip siunertanut eqqissinermut akornutaanngitsunik atorneqarnissaanik qulakkeerisussat naapertorlugit.

Taamatut ingerlanissaq aatsaat naammassineqareerpat, uranimik atuinissamut avammullu tunisassiornissamut qinnuteqaatit suliarineqarsinnaalissapput.

Taamaasilluni uani pineqanngillat uranimik piiaaniarluni qinnuteqaatinik aalajangersimasunik maannangaaq akuersissuteqarnissaq. Piffissarlu taanna nallerpat, isummerfigisassaq tassaasussaassagunarpoq, aatsitassanik qaqutigoortunik piiaanermut atatillugu uranimik taakkununnga ilanngullugu piiaaneq.

Aleqa Hammondip Arctic Circlep ataatsimeersuarneranut ammaanermi oqalugiaataa silaannaap allanngorneranut kiisalu 2015-imi nunarsuarmioqatigiit sila pillugu isumaqatigiissusiornissaannut tapersersorneqarnissamik pisariaqartinneqartumik imaqarpoq, tassani pineqarluni nunarsuarmioqatigiit avatangiisaanik illersuinissaq, immikkullu ittumik ingammik Issittumi avatangiisit innarliasut pillugit, kiisalu Naalakkersuisut silaannaap allanngorneranut atatillugu pingaarutilimmik akisussaaffeqarnerat.

Taamaattumik Nunatsinni erngup nukinganik nukissiutit, maanna kallerup innermik pilersuinerup 70 %-ianik ingerlanneqartut nangittumik annertusarnissaat nangissavarput. Oqalugiaammi maluginiarneqarpoq, kernekraft nunarsuup ilaani silaannarmik mingutsitsinermik aniatitsinerup annikillisarnerani annertuumik pingaaruteqartoq.

Oqalugiaammi naggasiutigineqarpoq, Kalaallit Nunaata nunanik tamalaanik suleqateqarnera pingaarutilerujussuusoq, aammalu Kalaallit Nunaata Issittup nunarsuarmioqatigiinnut ammariartuinnarnera ilutigalugu nunarsuarmi tamarmi pisuni akisussaaqataaffimmi kivinnissaanut piareeqqasoq.

Aleqa Hammondip Arctic Circlep ataatsimiinnerani oqalugiaataa tamakkiisoq uani atuarneqarsinnaavoq:

 http://naalakkersuisut.gl/~/media/Nanoq/Files/Pressemeddelelser/ARCTIC%20CIRCLE%20presentation%20FINAL%20EN.pdf

Arctic Circlep ataatsimeersuarnera uani malinnaaffigineqarsinnaavoq: www.arcticcircle.org, Twitter@ArcticAssembly #ArcticCircle aamma uani: Facebook, Google+ aamma YouTube.