Pinngitsaaliilluni atoqateqartarnermut tunngatillugu § 37-i tunngavigalugu apeqqummut erseqqissaassut

KNR-ip saqqummersitaani 9. oktober 2013-meersumi qulequtaqartoq: ”Massakkut aappariinnerup iluani atoqatigiinnikkut pinngitsaaliinerit, aappariinnerup avataanni pinngitsaaliinertut nalilerneqarsinnaanngorpoq”.

Tassunga tunngatillugu Ilaqutariinnermut Inatsinillu Atuutitsinermut Naalakkersuisoqarfiup erseqqissaassutigissavaa, ulloq manna tikillugu inatsisit atuuttut toqqammavigalugit akuerineqarsinnaanngisaannarsimammat, qunusaarinninneq pinngitsaaliiniarnerlu aallaavigalugit nuliarisap uerisarluunniit piumanngippat atoqatiginiarnissaa.

Allannguut § 37 toqqammavigalugu apeqquteqaatigineqartoq aallaaveqarpoq apeqquteqaatinut 2013/106 aamma 2013/191-t aqqutigalugit apeqquteqaateqarsimanerni pineqartut Nunatsinni Eqqartuussiveqarnermut Siunnersuisoqatigiit erseqqissaatigisaat toqqammavigalugu pinerluttulerinermi inatsimmi § 77, imm. 1 aamma 2-mi allaqqapput.

Inatsimmi pineqartumi oqaatsit atorneqartut imaapput:

Kinguaassiuutitigut pinerluttuliornerit
§ 77. Pinngitsaaliilluni atoqatiginninnermut eqqartuunneqassaaq kinaluunniit
1) nakuuserluni imaluunniit nakuusernissaq sioorasaarutigalugu pinngitsaaliilluni kujan-nittoq allatulluunniit kinguaassiuutitigut atoqatiginnittoq.
2) inummik katissimanngisaminik iliuutsimut akerlileeriarsinnaanngitsumik kujannittoq allatulluunniit kinguaassiuutitigut atoqateqartoq.
Imm. 2. Taamatuttaaq pineqassaaq kinaluunniit, iliuuseq imm. 1-imut ilaatinneqarsinnaanngikkaluartoq, unioqqutitsilluni pinngitsaaliilluni kujannittoq allatulluunniit kinguaassiuutitigut atoqatiginnittoq, takuuk § 91.

§ 77, imm. 1, nr. 2-mi aalajangersakkat toqqammavigalugit pineqanngilaq pinngitsaaliinnikkut atoqateqarneq tamatumanimi pineqanngimmat aappariinnerup iluanni uiminik nuliaminilluunniit atoqateqarneq, naak aapparisaq atoqateqarnissamut akerliori-arsinnaanngikkaluartoq.

Taamaattumik Ilaqutariinnermut Inatsisinillu Atuutitsinermut Naalakkersuisup noqqaassutigisimavaa danmarkimi naalakkersuisut inatsimmi § 77, imm. 1, nr. 2 allanngortinneqartariaqaraat.