Umiarsuarnik tunitsiviliisinnaanermut piumasaqaatit nutaat

Umiarsuarnik tunitsiviliisinnaanermut piumasaqaatit nutaat Naalakkersuisut 10. oktober 2013 akuerivaat. Piumasaqaatit nutaat nalunaarummut ilanngunneqartumi takuneqarsinnaapput.

Piumasaqaatiniit maannakkut atuuttunik allannguinermi siullermi aqutsiveqarfinni Upernavimmi Uummannamilu qaleralinnik umiarsuarmik tunitsiviliinissamut akuersissutaagallartut tunniunneqarneranni tunisinermi akit unammillissutaalernissaat periarfissinneqarpoq. Tamanna taamaallaat pissaaq suliffeqarfik qinnuteqartoq nunami tunisassiorfimmik aningaasaliinissamik siunertaqarpat. Taamatut pisoqarnerani nunami tunisassiorfimmik nutaamik pilersitsinissamut ukiunut marlunnut iliuusissatut pilersaarummik uppernarsaateqarnissamik piumasaqaateqartoqassaaq. Taamaallaat suliffeqarfiit aqutsiveqarfimmi nunami tunisassiorfeqanngitsut akuersissutaagallartumik pissarsisinnaapput.

Allannguutip aappaa tassaavoq tunngavinni saattuat maannakkut aamma ilanngunneqarnerat.

Pingajuattut umiarsunut tunitsiviusussanut tamanut tunngatillugu piumasarineqalerpoq taakku Kalaallit Nunaanni angerlarsimaveqartutut nalunaarsorneqarsimanissaat aammalu angallatinut 24 meterinik tamakkerlugu angussusilinnut inuttaqarneq pillugu nalunaarut malinneqassasoq, taamaalilluni aqumiut 60 %-ii Kalaallit Nunaanni angerlarsimaffeqassapput inuttallu sinneri tamarmik Kalaallit Nunaanni angerlarsimaffeqassallutik. Taamaaliornikkut ingerlatsinerni akileraarutinit isertitat inuiaqatigiinnit pissarsiarineqarnissaat qulakkeerneqassaaq.

Naggasiullugu nalunaarutigineqassaaq maanna ingerlatseqatigiiffik ataaseq aqutsiveqarfik Upernavimmi qaleralinnut umiarsuarmik tunitsiviliinissaminut piumasaqaatitalimmik akuerineqarsimammat.

Apeqqutissaqartoqarpat Aalisarnermut, Piniarnermut Nunalerinermullu Naalakkersuisoqarfik attavigineqarsinnaavoq uunga: 34 50 00 imaluunniit e mail: apnn@nanoq.gl


Ilanngussaq: - Umiarsuarnik tunitsiviliinermut periutsit oktober 2013