Taamaammat Nuummi umiarsualivik allineqassaaq

Nuuk Havn

Nuup umiarsualiviata allineqarnissaata inuiaqatigiit ataatsimut isigalugit imminut akilersinnaanera, Qeqqata Kommuniata allakkani ammasuni apeqquserpaa. Inuiaqatigiit aningaasaqarniarnerat ataatsimut isigalugu silatusaartumik nunalu tamakkerlugu iluaqutaasussamik aningaasaliinerusoq, Naalakkersuisut aalajangiusimavaat.

Nuummi umiarsualiviup allineqarnissaata aallartisarneqarnissaata aalajangiiviginissaanut siunnersuut, Inatsisartut marlunngornermi oktobarip arfineq pingajuanni 2013 aallarniutaasumik oqaluuserissavaat. Containerinut inissiiviup allineqarneratigut umiarsualivimmi suliarineqartartut allarpassuit inissaqarnerulissapput. Taamaasiornikkut umiarsualivimmi isumannaallisaaneq pisariillisaanerlu pitsanngoriaateqassapput.

Umiarsualiviup allineqarnera nunamut tamarmut iluaqutaassaaq. Immakkut usinik assartuinerup allanngortinneqarsinnaalerneragut, ukiumut 30 mio. koruunit sipaarneqarsinnaanissaat naatsorsuutigineqarpoq. Tamannalu nassiussanik assartuinermut akiliutaasartumik nalinginnaasumik sapinngisamik appasinnerpaaffissaaniititseqataassaaq. Tamatuma ilutigisaanik avannamut kujammullu nuna tamakkingajallugu, piffissaq assartuinermut atorneqartartoq agguaqatigiissillugu pitsanngoriaateqassaaq. 

-”Naalakkersuisut suliniut inuiaqatigiit aningaasaqarniarnerat eqqarsaatigalugu patajaatsutut nunatsinnullu tamarmut iluaqutaasussatut isigaat. Nuup umiarsualiviata allilerneqarneratigut umiarsualivimmi sulineq pisariillisinneqassaaq, assartuinerillu malunnaatilimmik pitsaannguuteqartinnerisigut, usit pilertornerusumik nunatta sinneranut siammarneqarsinnaalissapput,” taama oqarpoq Peqqissutsimut Attaveqarnermullu Naalakkersuisoq Steen Lynge, imalu nangippoq: 

-”Sapinngisaq tamaat ilisimasanik toqqammaveqarluni aalajangiisoqarnissaa qulakkeerniarlugu misissueqqissaarnerit arlallit ingerlanneqarsimapput. Inuiaqatigiit aningaasaqarniarnerannut qanoq sunniuteqarumaarnera misissuiffigineqarpoq, suliffeqarfiullu siunertaa, suliat, aaqqissuussaanera aningaasartuutaalu pillugit nalunaarusiortoqarluni, taakkulu aningaasaqarnikkut patajaatsuuneranik ersersitsipput. Assartuinermut ataatsimiitialiap siulittaasorisimasaata Christen Sørensenip Qeqqata Kommunianut akissummini Nuummi umiarsualiviup allilerneqarnissaata aarlerinaateqannginnera imminullu akilersinnaanera aalajangiusimagaa maluginiarparattaaq.”

- ”Nuup kisimi ineriartortinneqannginnissaa Naalakkersuisut annertuumik ukkataraat. Akerlianilli isumaqanngilagut Nuuk ineriartortinneqassanngitsoq. Usilli Nuummut assartorneqartartut Nunatsinni sumiiffinnut allanut assartorneqartartunit annertunerujussuunerat qularnaateqanngilaq. Taamaammat nunatsinni qitiusumik umiarsualiviup Nuummiinnissaa pissusissamisoorneruvoq,” Peqqissutsimut Attaveqarnermullu Naalakkersuisoq Steen Lynge oqarpoq.

Ilanngussaq