Naalakkersuisut Oslomi

Aleqa Hammond holder pressemøde

Naalakkersuisut Nunat Avannarliit Siunnersuisooqatigiivisa Oslomi ataatsimiinneranni peqataapput

Naalakkersuisut siulittaasuat Nunanullu allanut tunngasunut Naalakkersuisoq Aleqa Hammond suleqatiminik Ålandimeersumik Savalimmiuneersumillu, nunani avannarlerni statsministerinik ataatsimeeqateqarnerni kiisalu nunat avannarliit siunissami suleqatigiinnissaannik takorluuguqarneq pillugu Nunat Avannarliit Siunnersuisooqatigiivini oqallinnermi peqataavoq.

Nunani avannarlerni naalakkersuisuni siulittaasut arfineq pingasuusut ataatsimiinnerup kingorna nunani avannarlerni nunat akornanni killeqarfinni akimmisaarutinik nungusaaniarluni suleqatigiinnerup patajaallisarnissaa pillugu ataatsimut nalunaarusiaq atsioqatigiissutigaat. Suliniuteqarnikkut nunani avannarlerni ataatsimut sulisoqarnikkut niueqatigiissinnaanermullu periarfissanut kiisalu nunani avannarlerni ilinniartitaanikkut suleqatigiinnermut akimmisaarutit peerneqassapput. Taamaasippat nunarsuup immikkoor-tortaa tamaat isigalugu nunat avannarliit suleqatigiinnerat siuariartornermik siumukarnermillu kinguneqarsinnaavoq.

Statsministerit ataatsimiinneranni Aleqa Hammond-ip aamma erseqqissarpaa Issittumi Siunnersuisooqatigiinni sulinerup ataatsimoorullugu tapersersornissaa pillugu nunani avannarlerni naalakkersuisuni siulittaasut ingerlaavartumik oqaloqatigiittarnerat pingaaruteqartoq. Ukiut ingerlaneranni nunat avannarliit ataatsimut aningaasalersugaannik issittumi suliniutit pitsaasut arlaqartut ingerlanneqarnikuupput, Kalaallillu Nunaata kissaatigaa tamassuma patajaallisarnissaa assersuutigalugu peqqinnisaqarfiup iluani.

”Ålandimeersumik Savalimmiuneersumillu suleqatinnik nunanilu avannarlerni statsministerinik ataatsimeeqateqarneq pisarnermisut nunani avannarlerni pitsaasumik suleqatigeerusussuseqarnermik tunngaveqartumik ingerlanneqarpoq, tamannalu uannut pitsaasumik periarfissiivoq nunani avannarlerni suleqatinnik nunarsuup immikkoortortaanut tunngasunut aammalu nunanut allanut tunngasutigut politikkikkut oqaluuserinninnissamut” Aleqa Hammond oqaaseqarpoq.

”Manna tikillugu tamakkuninnga oqaluuseqarnissaq pisinnaasarsimavoq Nunat Avannarliit Siunnersuisooqatigiivisa ataatsimiinnerannut atatillugu, kisiannili danskit statsministeriata, lagmandimit uannillu kaammattorneqarluni nunani avannarlerni suleqatiminut siunnersuutigisimavaa, aamma ataatsimoortumik oqallittarnerit ingerlanneqartariaqartut nunani avannarlerni statsministerit aasaanerani ataatsimiinnerannut atatillugu, neriuppungalu kaammattuineq tamanna pitsaasumik kinguneqassasoq” Aleqa Hammond naggasiivoq.