Juliane Henningsenip isornartorsiuinera uniuinerarpaa


”Oslomi ulluni marlunni, kultureqarnermut naalakkersuisutut sulinera ullaamiit unnussuarmut ataatsimiittareerlunga, Juliaannap isornartorsiuinera eqqumiigeqaara.” Nick Nielsen, Savalimmiuniittumi Thorshavnimiit taama oqarpoq: Nicki nangippoq: ”Pilersaarusiaq malippara ataatsimiinnerillu uku peqataaffigaakka:

  • Ataasinngorneq ualeq: Nunat namminersortut ataatsimeeqatigiinnerat
  • Marlunngorneq ullaakkut: Nunat Avannarliit Killiit Siunnersuisoqatigiivisa siulersuisuinik ataatsimeeqateqarneq
  • Marlunngorneq ualikkut: Ataatsimeersuarnerup ammarneqarnera, naalagaaffinnilu naalakkersuisut siulittaasuisa ataatsimiinneranni peqataaneq
  • Pingasunngorneq ullaakkut: Nunat Avannarliit Siunnersuisoqatigiivisa ataatsimiititsineranut peqataaneq kingornalu inatsisartuni ilaasortat Nunani Avannarlerni kultureqarnermut naalakkersuisuinik ataatsimeeqateqarneranni peqataaneq
  • Pingasunngorneq ualikkut: Nunani Avannarlerni naalakkersuisut ataatsimiinnerat, kultureqarnermut naalakkersuisut
  • Pingasunngorneq unnukkut: Nunat Avannarliit kulturikkut suliaqartunut nersornaasiineranni peqataaneq   

Qulaani taaneqartut saniatigut Nunani Avannarlerni suleqatikka angusaqarluartumik oqaloqatigaakka aamma Juliaannamik – Nunani Avannarlerni oqaatsinut isumatigiissummut oqaaseqarnera pillugu.

Nunanut Avannarlernut tunngasunut ullumi pilersaarummiittoqannginnama Savalimmiunukarpunga naalakkersuisoqatiga Bjørn Kalsø ataatsimeeqatigiartorlugu, siunertaavorlu misilittakkanik avisseqatigiinnissaq suleqatigiinnissarlu, tassalu oqaatsit pillugit inatsisitta nutarterneqarnissaa ilaatigut oqaluuserisassatut qaqittussaavarput. Aqagu Savalimmiuni suliffeqarfiit arlallit pulaassavagut”.  


Inussiarnersumik inuulluaqqusillunga


Nick Nielsen

Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisoq