Martha Lund Olsen-ip Nunani Avannarlerni Inatsisilerinermik Ministerit ataatsimeeqatigilerpai

Inatsisinik Atuutitsinermut Naalakkersuisoq Martha Lund Olsen, ulluni 30. september – 1. oktober 2013 Nunani Avannarlerni Inatsisilerinermik Ministerit ataatsimiinneranni Rånäs Slott, Stockholm-imi pisussami peqataaniarpoq.

Ataatsimiinnermi Nunani Avannarlerni inatsisilerinikkut sulinermi soqutiginaateqartut assigiinngitsut oqaluuserineqassamaarput.

Inatsilerinerinermut Ministerit Ilaatigut eqqartuiffiginiarpaat arnat aammalu nunanilu allaneersut nunani pineqartuni parnaarussivinni inissisimatinneqartartut atugarisaat.

Nunani Avannarlerni pinerluttaalisitsinikkut isumaginninnermi pisortat isiginnittariaaseqarnerminni suli paasisisimaqarnerulernissaat siunertaralugu peqataatinneqassamaarput. Tassami ileqquulernikuusimammat oqartussaaffeqarfiit assigiinngitsut ministerit ataatsimeeqqatigiinneranni najuutitinneqartarnerat. Nunani Avannarlerni Inatsisilerinermut Ministerit pinerluttaalisitsinikkullu isumaginninnermik pisortat ataatsimoortillugit ataatsimiissinneqarnissaanut siunertaavoq oqaluuserisassat sukumiisumik tamatigoorluartumillu sammineqarsinnaanissaat.

– Nunatsinnut tunngatillugu maluginiagassatut saqqummiunniakkat ilagivaat sinerissami eqqartuussaaniarlutik utaqqisorpassuit erseqqissaassutiginissaat. Tassuunatigummi siunertarineqarmat sulisut suli amerlanerusut atorfinitsinneqarsinnaanissaat, taamatut oqaaseqarpoq Martha Lund Olsen.

Ataatsimiinnissaq marloqiusanngorlugu avinneqarsimavoq. Immikkoortumi siullermi nalinginnaasumik Nunani Avannarlerni Inatsisilerinermut Ministerit ataatsimiissapput, taavalu ataatsimiinnerup immikkoortuani allami silinnerusumik oqallittoqassalluni.

Ataatsimiinnermi ukua peqataasussaapput

  • Inatsiseqarnermut Ministeri Anna-Maja Henriksson, Finland
  • Inatsiseqarnermut Upalungaarsimanermullu Ministeri Grete Faremo, Norge
  • Inatsisilerinermut Ministeri Beatrice Ask, Sverige
  • Inatsisilerinermut Ministeri Morten Bødskov, Danmark
  • Inatsisinik Atuutitsinermut Naalakkersuisoq Martha Lund Olsen, Kalaallit Nunaat