Eqqumiitsulianik saqqummersitsivik

Ilulissaniit, PI-SPS-ip aaqqissugaanik meeqqat inuusuttullu piginnaasaannik ilisimasat pillugit ataatsimeersuarnermi ulluni kingullerni peqataaffigisaminit kultureqarnermut Naalakkersuisoq oqaaseqarpoq:

”Nuna tamakkerlugu, eqqumiitsulianik saqqummersitsiviup, Nuummi sinerissamiluunniit sinerissamiluunniit illoqarfinni allani, ingerlanneranut aningaasanut inatsisissatut siunnersuummi aningaasanik immikkoortitsisoqanngilaq. Ingerlataqarfinni ukiut kingulliit ingerlaneranni periusaasarpoq aningaasaateqarfiit naammassereeraangata sanaartornissamullu aningaasanik neriorsuuteqareeraangata illut aningaasaateqarfinnit aningaasalersorneqartut ingerlanneqarnerannut aningaasanik tapersiisoqarnissaanik kissaateqarlutik suliniuteqartut Naalakkersuisunut saaffiginnittarnerat. Tamanna tunngavigalugu aningaasanut inatsisissatut siunnersuummi siunertamut ingerlatsinermut aningaasaliisoqassanersoq Naalakkersuisut isummertarput.

Tamanna takuarput Sisimiuni Apissip – ingeniørinngornianut ineqarfiup sananeqarnerani kingullertigullu pinngortitalerinermik ilinniarnernut kiisalu peqqissuseq pillugu annertunerusumik ilisimatusarnissamut atugassamik Pinngortitaleriffiup allilernerani ingerlatsinermut aningaasaliisoqarnissaanik suliniuteqarnissamik Naalakkersuisut neriorsuinerisigut.

Isumaqarpunga Nuna Tamakkerlugu Eqqumiitsulianik Saqqummersitsivik Kalaallit Nunaanni nuannaarutigineqartorujussuussasoq. Suliniuteqartunit saaffigineqarnikuunngilanga, neriorsuutigerusussinnaavarali aningaasaateqarfiit aningaasaliinissaat inissippat saqqummersitsiviullu ingerlanneqarnissaanik aalajangiinissaq kisimi amigaataalerpat saaffiginnittoqarnissaa Naalakkersuisut tigulluassagaat.”