Aningaasanut inatsit nunamut tamarmut attuumassuteqartoq

Penge


Kræftip katsorsarneqartarneranut pilersaarut, sinerissami sanaartornerunissaq, umiarsuakkut angallassinermi aningaasat amerlanerit, suliffissaaleqinerup akiorneqarnera kiisalu inuit tamat oqartussaaqataanerannut nukittorsarniarlugu aningaasaliissutit. Anguniakkat, Aningaasaqarnermut Nunamullu Namminermut Naalakkersuisup 2014-imut Aningaasanut Inatsisissap aappassaaneerneqarnissaanut aningaasalersornissaannik nassaarussimasai.

-       Partiit tamaasa pitsaasumik oqaloqatigisimavakka. Tamarmik assigiinngitsunik aallaaveqaraluarput, kisianni allannguutissatut siunnersuutit uku atorlugit partiit tamarmik kissaataat piviusunngortinniarsimallutigit. Tamatumani Kalaallit Nunaat tamakkerlugu aaqqiissutissanik nassaarniarsimavugut, Vittus Qujaukitsoq oqarpoq nangillunilu:

-       Nunatsinni pissutsit tamanut pitsanngornissaat, Naalakkersuisunut pingaaruteqarpoq. Taamaasiorpugut, sanaartornerup siammarterneratigut tamatumunngalu ilutigitillugu suliffissaaleqinermik akiuiniarnerput annertusillutigu. Aamma nunamut tamarmut iluaqutaassaaq, kræftip akiorniarnerani pilersaarutip aallarnisarneqarnissaanut aningaasaliissuteqarnitsigut.

Taassuma saniatigut Naalakkersuisut tamat oqartussaaqataanerat nukittorsarniarlugu 1 mio. kruuninik aningaasaliissuteqarput, kattuffiillu politikkimut attuumassuteqanngitsut suliniutinut annertuunut immikkut ilisimasalinnik ikiorneqarnissaminnut aningaasanik qinnuteqarsinnaapput.

Tamatumunnga ilutigitillugu Nuummi inissianik tuniaaneq ukiuni arlalinni pisussanngorlugu aaqqissuussimavarput. Tamatuma aningaasanut inatsisip ukiuni sisamani oqimaaqatigiinnissaa allanngortissanngilaa.

 

Naggasiutigalugu Vittus Qujaukitsup maluginiarpaa, isumaqatigiinniarnerni aalisarneq aamma isumalluutinik pissarsiassat akileraarusertarnerannut politikkikkut isumaqatigiittoqartorujussuusoq. Taamaattumik Naalakkersuisut inuussutissarsiortut aningaaseriveqarnermillu sullissisut tuaviornerpaamik sulinermi peqataatinniarpaat.

 

Paasissutissat sukumiinerusut uannga piniarneqarsinnaapput:

Naalakkersuisup allattaa Marthanguaq Rasmussen attaveqarfiguuk oqarasuaat 34 52 12 imaluunniit mail: marm@nanoq.gl atorlugu.