Ambassadøri tikeraartoq

Amerikkarmiut ambassadøriat nunatsinnut tikeraartoq

Københavnimi amerikkarmiut ambassadøritaavat J. Rufus Gifford Nuummut Ilulissanullu tikeraarpoq. Ambassadørip Naalakkersuisut siulittaasuat Aleqa Hammond naapippaa aamma Joint Committeep ukiumoortumik Nunatsinnik ataatsimeeqatiginerani peqataavoq. Ambassadørip ivertinneqarnermi kingorna sapaatip akunneri marluk qaangiutiinnartullu toqqaareersimavoq Nunatsinnukarluni Naalakkersuisut siulittaasuat Aleqa Hammond naapinniarlugu tassungalu atatillugu Joint Committeemi ataatsimiititsineq ingerlanneqassasoq. Naalakkersuisut Siulittaasuata aamma Ambassadørip akornanni ataatsimiinnermi uranip allallu atortussat radioaktiviusut akuersaanngilluinnarnissaasa atorunnaartinnissaat, Isittup imartaani avataasiorluni aalisarneq, aamma Joint Committeemik isumaqatigiissutip iluani USA-mik suleqateqarnerup killiffia eqqartorneqarput. Illuatungeriit marluullutik pissutsinik iluarisimaarinnipput minnerunngitsumillu 2014-imi Washington D.C.-mi kalaallit sinniisuutitaannik pilersitsinissamut atatillugu qaninnerusumik atassuteqalersitsinissamut periarfissat nuannaarutigalugit.

Ukiumoortumik Joint Committeemi ataatsimiinneq nutaamik isikkoqartillugu ingerlanneqarpoq, tassani kalaallit naalakkersuisuinit pingaarnersiunerit, aatsitassaqarnermut immikkoortortaqarfiup iluani ineriartortitsineq, aamma susassaqarfiit taakku iluanni suleqatigiinnissamut periarfissat saqqummiunneqarput. Pingaartumik Kalaallit Nunaanni uranip tungaatigut politikkimut tunngatillugu Mark Shaffer, Nuclear regulatory commissionimeersoq peqataatillugu, aamma Issittup imartaani avataasiorluni aalisarnermut tunngatillugu Dave Balton, Deputy Assistant Secretary Office of Oceans and Polar Affairs i State Departementimeersoq peqataatillugu eqqartuisoqarpoq. Isumaqatigiissutigineqarpoq, Joint Committeep akisussaaffiisa iluanni nutaarsiassaatillugu niuernikkut aningaasaliinikkullu suleqatigiinnissaq ukiuni aggersuni immikkut qitiutinneqassasoq. Ataatsimiinneq naggaserlugu, Kalaallit Nunaata siulittaasoqarfik USA-mut tunniuppaa taanna Joint Committee tullissaanik 2014-imi ataatsimiilerpat qaaqqusisuusussaavoq.

Aleqa Hammond ataatsimiinnerup kingorna oqarpoq:

”Sapaatip akunneri marluunngitsut qaangiupput Ambassadør Giffordip uppernarsimmagu Danmarkip Kongeqarfiani USA-mut sinniisuutitaalerluni. Nuannaarutigivara, USA-p taamak iliornermigut Kalaallit Nunaat pingaarutilinnut ilaatinniarlugu toqqarsimammagu.

Qularutiginngilara, susassaqarfinnik arlalinnik siunissami USA-p aamma Kalaallit Nunaata akornanni qanimut suleqatigiissutigisinnaasaannik peqassasoq.

2004-mi USA peqatigalugu Igalikumi isumaqatigiissuteqarnerup kingorna Joint Committeemi ataatsimiinnerit una qulingiluassarivaat. Ambassadør Giffordimik ataatsimeeqateqartillunga pingaartillugu isiginiarsimavara USA peqatigalugu USA-p aamma Kalaallit Nunaata akornanni suleqatigiinnissamut atugassarititaasunik nutarterinissamik suliaqarnissaq massakkut aallartinneqartariaqartoq.

Ambassadørimik eqqartuinera malillugu, suleqatigiinnerup annertusineqarnissaanut periarfissat amerlapput, ingammik niuernerup aamma aningaasaliinerup iluani. Tassunga atatillugu Washington D.C.-mi kalaallit sinniisuutitaannik ammaaneq ilorraap tungaanut alloriarneruvoq pingaartoq.”