Royal Greenlandip Wilhelmshaveni tunivaa

Royal Greenland A/S Tysklandip avannaani fabrikkini, Wilhelmshaven tunivaa. Fabrikki aningaasat millionilikkaat pingasunik sanileriinnik kisitsisitallit nalinginut tunineqarpoq asiamiunut aningaasaliinissamut piginneqatigiiffiinut marlunnut, Sahara Investment Group Pte. Ltd.-imut aamma Meridian Investment Group Pte. Ltd-imut.

Naalakkersuisut maannakkut niuerfiusut ajornakusoortumik atugaqarfiunerat eqqarsaatigalugu fabrikkimik tunisinermik iluarinnipput. Ingerlatseqatigiiffiit Kalaallit Nunaannut nunanullu avannarlernut periusissiamik aallutaqarnerunissamik sammivilerniarneqarnerat eqqarsaatigalugu Naalakkersuisut tunisineq eqqortumik alloriarnermik nalilerpaat.

Naalakkersuisut siulittaasuat Aleqa Hammond oqarpoq:

”Wilhelmshavenip tunineqarnera iluarisimaaqaara Royal Greenlandilu qutsavigalugulu nersualaarusuppara”

Royal Greenland A/S-ip tunisinermigut tysklandip avannaani sulisut 500-t missaanniittut sulisoriunnaartussanngorpai. Taamaasilluni suliffeqarfissuaq katillugit 1500-nik sulisoqalissaaq, taakkunannga 800-t Nunatsinni sulisorineqarlutik.

Wilhelmshavenip tunineqarnera ingerlatseqatigiiffiup aningaasaqarneranut pitsanngorsaatissatut siullertut atorneqassaaq, tamatumani ingerlatseqatigiiffik akiitsuminik annikillisaaqqittussanngorluni.