Villy Søvndalip Nuummut tikeraarnera

Nunanut Allanut Ministerip Villy Søvndalip Nuummut tikeraarnera

Naalakkersuisut Siulittaasuat Aleqa Hammond kiisalu Aalisarnermut, Piniarnermut Nunalerinermullu Naalakkersuisoq Karl Lyberth ataatsimeeqatiginiarlugit Nunanut Allanut Ministeri Kalaallit Nunaanniippoq.

Tassunga atatillugu Nunanut Allanut Ministeri Villy Søvndal aamma Naalakkersuisut Siulittaasuat Aleqa Hammond tusagassiortunut kalaallinut ippassaq katersortitsipput.

Tusagassiortunik katersortitsinermi Aleqa Hammondip Villy Søvndalillu Issittumi Siunnersuisoqatigiit, Inatsisartunut siunnersuutigineqarsimasup "uranimik akulimmik piiaaqqusinnginnerup" kiisalu aatsitassanik allanik radioaktiviusunik piiaaqqusinnginnerup atorunnaarsinneqarnissaa kiisalu IWC pillugit Danmarkip Kalaallit Nunaatalu akornanni ataatsimoorluni oqaloqatigiinnerit pingaartillugit saqqummiuppaat.

Kalaallit Nunaata Issittumi Siunnersuisoqatigiinni peqataaqqilernera:

Kalaallit Nunaata Issittumi Siunnersuisoqatigiinni peqataaqqilernera eqqartorneqarpoq. Nunanut Allanut Ministeri Villy Søvndal aamma Naalakkersuisut Siulittaasuat Naalagaaffeqatigiit nukittorsaataasumik Issittumi Siunnersuisoqatigiinni peqataaqqilernerat pillugu naammagisimaarininnertik oqaatigaat. Nunanut Allanut Ministerip atorfillit tungaannit isumaqatiginninniarnissamut piumassuseqarsimaneq Canadamiunik Issittumi Siunnersuisoqatigiinni siulittaasuutitaqartunik pitsaasumik angusaqarfiusimasoq pillugu naammagisimaarinnini ersersippaa. Nunanut Allanut Ministerip qulequttat eqqartugassat, soorlu assersuutigalugu ilisimatusarnikkut suliat aamma imaatigut angalanermi sillimaniarneq Issittumi Siunnersuisoqatigiinni eqqartorneqarnissaata pingaaruteqartuunera erseqqissarpaa.

Ataatsimiinnerup kingorna Aleqa Hammond ima oqarpoq:

- Qanimut angusaqarfiulluartumillu Canadamiut Issittumi Siunnersuisoqatigiinni siulittaasoqarfiat naalagaaffiillu ilaasortaasut allat suleqatigiinnissamut qilanaarpunga. Canadamiullu sorpassuartigut Issittumi ataatsimoorussaqarpugut, Canadamiullu Issittumi Siunnersuisoqatigiinni sulittaasuutitaqartut Issittumi innuttaasut inuunerissaarnissaannik salliutitsinerat nuannaarutigaara. Kalaallit Nunaanni periarfissarpassuatta unammilligassarpassuattalu ilaat Canadap Issittortaani periarfissarineqarlutillu unammilligassarineqarput.

Siunissami Danmarkip Kalaallit Nunaatalu suleqatigiinnerat Inatsisartuni siunnersuutigineqarsimasoq "uranimik akulimmik piiaaqqusinnginnerup" kiisalu aatsitassat radioaktiviusut allat atorunnaarsinneqarnissaat pillugit suleqatigiinneq unitsinneqassaaq:

Siunissami Danmarkip Kalaallit Nunaatalu suleqatigiinnerat Inatsisartuni siunnersuutigineqarsimasoq "uranimik akulimmik piiaaqqusinnginnerup" kiisalu sananeqaatit radioaktiviusut allat atorunnaarsinneqarnissaat pillugit suleqatigiinneq unitsinneqassaaq: Inatsisartuni siunnersuutigineqarsimasoq "uranimik akulimmik piiaaqqusinnginnerup" kiisalu aatsitassat radioaktiviusut allat atorunnaarsinneqarnissaannut tunngatillugu Villy Søvndal aamma Naalakkersuisut Siulittaasuat oqarput erseqqissarlugulu, Kalaallit Nunaata Danmarkillu akornanni sillimaniarnermi illersornissamilu politikki pillugu kalaallit uranimik piiaalissagaluarpata avammullu tuniniaallutik, tassani qanimut oqaloqatigiinnissaq pingaaruteqartorujussuusoq.

Nunanut Allanut Ministerip erseqqissarpaa danskit tungaannit Kalaallit Nunaata aatsitassarsiornermut tunngatillugu tamakkiisumik oqartussaanerata apeqquserneqannginnera, kisiannili Danmarkip sillimaniarnermi illersornissamilu oqartussaanerata kalaallit uranimik atuilernissaasa avammullu tunisassiulernissaasa qanoq annertutigisumik sunniuteqarnissaa apeqqutaasoq.

Ataatsimiinnerup kingorna Aleqa Hammond ima oqarpoq:

- Ullumi uranimik aatsitassanillu allanik radioaktiviusunik tunisassiulernissamut atatillugu killiliussassat pisariaqartut pillugit eqqartuivugut. Soorunami kalaallit uranimik atuinissaanni avammullu tunisassiornissaanni sillimaniarnerup illersornissallu tungaatigut arlaatigut kingunissaqarpoq. Tamakkua Danmark peqatigalugu ataatsimoorluta aamma siunissami qulaajartassavavut.

IWC-mi peqataaneq:

Kunngeqarfiup Danmarkip IWC-mi peqataanera ataatsimiinnermi aamma eqqartorneqarpoq. Nunanut Allanut Ministerip Villy Søvndalip aamma Naalakkersuisut Siulittaasuata Aleqa Hammondip IWC-p nammineerluni arfattassiissutinut tunngatillugu biologit ilisimatuullu tunngavigisaat ataqqillugit ingerlanneqarnissaa, tassalu piniarnerup uumasunillu illersuinerup qulakkeerneqarnissaasa pingaaruteqassusaat tamarmiullutik erseqqissarpaat.

Kalaallit Nunaata Danmarkillu danskit kalaallillu politikkerii Kalaallit Nunaanni isumannaatsumik arfanniarsinnaaneq pillugu Kalaallit Nunaanni isumasioqatigiinnissamut novemberimi pisussamut qaaqquaat. Kungeqarfiup Danmarkip IWC-mi ilaasortaaginnarnissaa pillugu periarfissat tamaviisa misissoqqissaarneqarnissaat pillugu isumaqatigiittoqarpoq.

Ataatsimiinnerup kingorna Aleqa Hammond ima oqarpoq:

- Kalaallit Nunaannut naqissusissallugu pingaaruteqarpoq, Kalaallit Nunaata IWC-miiginnarnissani kissaatigimmagu. Arferit angisuut ataatsimoorullugit pisuussutaapput pigisavut, taakkualu nunarsuarmioqatigiit akornanni nalimmassarneqartariaqarput. Taamatut nalimmassaaneq biologit ilisimatuullu naliliinerat aalajangersimasoq tunngavigalugu pisariaqarpoq.


Inussiarnersumik inuulluaqqusillunga

Aleqa Hammond
Naalakkersuisut Siulittaasuat