Uranimik nalunaarusiap tamanut saqqummiunneqarnera

Arlaannaannulluunniit attuumassuteqanngitsumik uranimik nalunaarusiap tamanut saqqummiunneqarnera

Uranimik aatsitassanillu allanik radiup qinngornerik akulinnik atuinissamut naaggaarluinnarnerup atorunnaarsinneqarnissaa allanngortinneqarnissaaluunniit pillugit immikkut ilisimasallit arlaannaannulluunniit attuumassuteqanngitsut nalunaarusiaat ulloq 12. september tamanut saqqummiunneqarpoq.

Immikkut ilisimasalinnit nalunaarusiap taassuma ilaatut allassimavoq ”uranimik aatsitassanillu allanik radiup qinngornerinik akulinnik atuinissamut naaggaarluinnarnerup atorunnaarsinneqarnerani allanngortinneqarneraniluunniit inatsisitigut tunngaveqarnissaq”, taanna Lett Advokatfirmap allataraa.

Tamatuma kingorna allassimasoq taanna kalaallit danskillu tusagassiorfiisigut sammineqangaatsiarpoq, ilaatigut danskit nunanut allanut ministeriata ulloq 17. september 2013 Politikkenimit apersorneqarluni nalunaarusiaq ”kalaallit illuatungiliuttutut oqaaseqaatigisaattut” taavaa, tassa kalaallit uranimik atuissappata avammullu niueruteqassappata isummannaallisaanermut illersornissamullu politikkimut attuumassuteqarnera pillugu Kalaallit Nunaata Danmarkillu oqaloqatigiinnerannut tunngatillugu.

Pisariaqarpoq erseqqissaaffigissallugu uranimik aatsitassanillu allanik radiup qinngornerik akulinnik atuinissamut naaggaarluinnarnerup atorunnaarsinneqarnissaa allanngortinneqarnissaaluunniit pillugit immikkut ilisimasallit arlaannaannulluunniit attuumassuteqanngitsut nalunaarusiaat, Lett Advokatfirmap allassimasaanik imaqartoq, Inatsisartunut nalunaarusiaammat arlaannaannulluunniit attuumassuteqanngitsunit, taanna Inatsisartut 2012-imi ukiakkut ataatsimiinneranni inniminnigaavoq.

Taamaammat nalunaarusiaq aamma Lett Advokatfirmap allataa Kalaallit Nunaata Danmarkillu oqaloqatigiinneranni Kalaallit Nunaata illuatungiliuttutut oqaaseqaataatut isigineqarsinnaanngillat.

Paasissutissiissutigineqassaaq Kalaallit Nunaata uranimik atuisinnaaneranut avammullu niueruteqarsinnaaneranut tunngatillugu aatsitassarsiornermi aamma sillimaniarnermi illersornissamilu oqartussaanermik nalilersuisimanerit pillugit danskit kalaallillu naalakkersuisuinit allagaqarmat.

Aleqa Hammond oqarpoq:

"Uranimut tunngatillugu oqartussaaffiup assigiinngitsunik inatsisitigut nassuiarneqarnera pillugu Danmark Kalaallillu Nunaat suliamut atatillugu namminneq allakkiaqarput. Lettip nalunaarusiaa Kalaallit Nunaata allatarinngilaa. Lettip nalunaarusiaa arlaannaannulluunniit attuumassuteqanngitsumik nalunaarusiaavoq Inatsisartut/Kalaallit Nunaanni inatsisartut 2012-imi ukiakkut ataatsimiinneranni inniminnigaq. Maluginiarparali Lettip nalunaarusiaani Kalaallit Nunaata aatsitassarsornermi aamma sillimaniarnermi illersornissamilu oqartussaaneranut tunngatillugu assingusumik nassuiaateqartoq."

Nunanut allanut ministeri Villy Søvndal Naalakkersuisut siulittaasuat Aleqa Hammond ataatsimeeqatiginiarlugu ulloq 16. september Kalaallit Nunaanniippoq. Tamatuma kingorna tusagassiuutinut saqqummiussinermi Aleqa Hammondip Villy Søvndalillu pingaartillugu oqaatigaat, uranimik allanillu radiup qinngornerinik akulinnik piiaanissamut ”naaggaarluinnarnerup” atorunnaarsinneqarnissaa pillugu Inatsisartut aalajangiiffigisassaattut siunnersuuteqartoqarneranut atatillugu Danmarkip Kalaallillu Nunaata siunissami suleqatigiinnissaannik oqaloqatigiissimanertik.

Nunanut allanut ministerip Villy Søvndalip Naalakkersuisullu siulittaasuata ataatsimiinnermi erseqqissarpat Kalaallit Nunaata uranimik atuisinnaanera avammullu niueruteqarsinnaanera pillugit isumannaallisaanermut illersornissamullu politikkimut tunngassuteqartortaat pillugit Kalaallit Nunaata Danmarkillu oqaloqatigiittuarnissaat pingaaruteqartoq. Nunanut allanut ministerip erseqqissaatigaa Kalaallit Nunaata aatsitassarsiornermut tunngatillugut tamakkiisumik oqartussaanera danskit tungaannit apeqquserneqanngitsoq.


Aleqa Hammond,
Naalakkersuisut Siulittaasuat