Inuusuttut suliffissaaleqinerat nunanillu allanit sulisartut

Siunnersuisooqatigiit nutaat inuusuttut suliffissaaleqinerat nunanillu allanit sulisartut oqallisigissavaat

Suliffissaaleqineq, nunanit allanit sulisartut piginnaanngorsaaqqinnerlu. Tassaapput maannakkut suliffeqarfimmi unammillerfissatta ilaannangui. Unammillerfissallu naammaginartumik iluarsiivigineqassappata suliaqarfiup tamarmiusup isinik nutaanik ukkitarinissaa pisariaqarpoq.

Taamaattumik siunnersuisooqatigiinnik nutaanik suliffeqarfimmut tunngasunik apeqqutinik suliaqartussamik Inuussutissarsiornermut Aatsitassaqarnermullu Naalakkersuisup Jens-Erik Kirkegaardip pilersitaqarnissaq toqqarsimavaa: Naalagaaffigisami Suliffeqarnermut Siunnersuisooqatigiit. Siunnersuisooqatigiit kommuninit kattuffinnillu, ulluinnarni sulinerminni siamasissutut paasillugu suliffeqarfimmik qanimut attuumassuteqartunit sinniisuutitanik ilaasortaqassaaq.

2017-ip naannginnerani suliffissaaleqinermik affaannanngortitsisussamik suliffeqartitsinermik pilersaarummut siunnersuut Kirkegaardip ataatsimiinnermi saqqummiuppaa. Pilersaarut pingaarnertut iliuuseqarfissanik sisamanik imaqarpoq:

  1. Inuusuttut 29-t inorlugit ukiullit
  2. Ilinniagaqarsimanngitsut
  3. Nunaqarfiit isorliunerusullu
  4. Suliffeqarfiup avataaniittut

”Suliffissaaleqinerup akiorniarneranik Naalakkersuisut assut pingaartitsipput, taamaattumillu suliaqarfimmik isinik nutaanik tamatigut ukkitaqarnissamik assut pisariaqartitsisoqarpoq. Amerlanerimmi suliffeqartinnissaat pineqaraangat isumassarsiat tamaasa saqqummiuttariaqarput,” Inuussutissarsiornermut Aatsitassaqarnermullu Naalakkersuisoq Jens-Erik Kirkegaard oqarpoq, neriupporlu siunnersuisooqatigiit ataatsimiinnerminni suliffeqarfiusumi inississimanerluttunut iluaqutaasussanik siunnersuutinik pitsannik amerlasuunik piviusutut politikkimut nuunneqarsinnaasunik saqqummiussissasut.

Siunnersuisooqatigiit Nuummi 24.-25. septembarimi siullermeerlutik ataatsimiissapput, tassanilu oqaluuserisassat tassaassapput: Suliffeqarfimmut piareersimanissamik oqariaaseq, Suliffeqarfik initooq, Suliffissaaleqisut iliuuseqarnissamik pilersaarummut ilitsersorneqarnissamullu pisinnaatitaaffiat, aamma Inuusuttuni suliffissaaleqineq.

Ukiuni tamani Siunnersuisooqatigiit sisamariarlutik ataatsimiittassapput, sammisassat ulluni taakkunani saqqumilaartut oqallisigineqartassallutik. Ataatsimiinnerit tulliat 20.-21. november 2013-imi pissaaq.