Naalagaaffiup Kukkunersiuisuisa nalunaarutaat

Danmarkip Issittumi iliuuseqarnera pillugu Naalagaaffiup Kukkunersiuisuisa nalunaarutaat pillugu

Nuannaarutigaara Naalagaaffiup Kukkunersiuisuisa – Issittumi naalagaaffinnik allanik suleqateqarnerminnut ilanngullugu – Danmarkip ujaasinermut, annaassiniarnermut, imaani isumannaatsumik angalanermut kiisalu Naalagaaffeqatigiit Issittumi imaatigut avatangiisaanik nakkutilliineq nalilersorsimammassuk. Naalagaaffiup Kukkunersiuisuisa nalunaarutaanni pissutsit danskit naalakkersuisuisa suliamik naammassinninniarnerannut attuumassuteqartut arlallit isornarsinnaasut tikkuarneqarput. Ilutigitillugulu nalunaarummi tikkuarneqarpoq suliassaqarfiit ilaatigut nukittorsarneqartussat assersuutigalugu tassaasut ataqatigiissaarineq aamma annaassiniarnermut upalungaarsimanermullu (SAR-imut) atatillugu danskit oqartussaasut akornanni akisussaaffit ersarinnerusumik agguataarneqarnissaat.

Issittup nunarsuarmioqatigiinnit isiginiarneqarnerujussuata kingunerisaanik imartatsinni angallanneq annertunerulersimavoq, tamatumalu kingunerisaanik inunnik annaasaqaratarsinnaaneq kiisalu avatangiisinik mingutsitsisinnaaneq annertunerulersissimavaa. Ajoraluartumik imartatsinni ajunaartoqartillugu annaassiniarnissamut periarfissaq ataasiinnaasarpoq. Taamaattumik annaassiniartartut Issittumi sulisinnaanissamut ilinniarsimanissaat kiisalu atortut Issittumi atorneqartussatut, minnerunngitsumillu ajutoortoqartillugu sukkasuumik atorneqariaannaasinnaanerisa, naatsorsuutigineqarsinnaanerat pingaaruteqarput.

Naalagaaffeqatigiit Issittumi Periusissaat aallaavigalugu ataatsimoorluta tamakkua danskit oqartussaasuinit amigaatigineqartut iliuuseqarfigineqarnissaat tunngavilersimavarput. Taamaattumik Issittumi imartatsinnut uagut akisussaaqataaffigisatsinnut tunngatillugu sillimaniarnerup sulissutigineqarnera nangissavara, taamaasilluta annertunerusumik imartatsinni angalasoqarneranut tulluuttumik sillimaniarnerup isumannaatsup anguneqarnissaa siunertaralugu.

Inussiarnersumik inuulluaqqusillunga

Aleqa Hammond, S,
Naalakkersuisut Siulittaasuat