Angalaqatigiittartussat suliassartik aallartilerpaat

Kinguaassiuutitigut atornerlunneqarsimasut ilinniarsimasunit ikiorserneqartassapput
Katsorsaallutik angalaqatigiittartussat suliassartik aallartilerpaat

Ilaqutariinnermut Naalakkersuisoq, Martha Lund Olsen, inersimasunik meeraanerminni kinguaassiuutitigut atornerlunneqarsimanertik pissutigalugu kingunerlutitsisunik katsorsaasussanik angalasartussanik pilersitsivoq.

Nunatsinni inersimasut amerlaqisut meeraanerminni kinguaassiuutitigut atornerlugaasimapput, tamatumalu arlalitsigut nassatarisarpaa inersimasunngornermi inooqatigiissutsikkut tarnikkullu ajornartorsiuteqarneq. Taamaammat Ilaqutariinnermut Inatsisinillu Atuutitsinermut Naalakkersuisoq, Martha Lund Olsen, ilinniarsimasunit katsorsarneqarnissamik neqeroorummik pilersitsiniarpoq, inuiaqatigiinni siamasissumik atuutilersussamik.

”Ukiorpassuarni kinguaassiuutitigut atornerluinerup pinaveersaartinnissaa aallutarisimavarput, nuannaarutigisinnaavarpullu Kalaallit Nunaat paquminartup kipitinnissaanut atornerluinerullu akiornissaanut tunngatillugu Issittumi nunani siuttunngorsimammat. Kisianni nassuerutigisariaqarparput ajornartorsiut akiussagutsigu pinaveersaartitsineq naammanngimmat, tassami kinguaassiuutitigut atornerlugaanerup arlalitsigut nassatarisarpai tarnikkut ajornartorsiuteqalerneq, ilinniarsimasunit ikiorserneqarnissamik pisariaqartitsiviusoq”, Martha Lund Olsen oqarpoq.

Angalaqatigiittartut psykologinik namminersortunik inuttaqarput, inersimasunut tarnikkut katsorsaanermik misilittagaqartunik inuttaqarput, taamaalillutik kinguaassiutimikkut atornerlunneqarsimasut ilinniarluarsimasunik katsorsarneqarsinnaalissapput

”Anguniagaavoq ilaqutariit nukittorsarneqarnissaat. Inersimasut katsorsarneqarnissamik neqeroorfiginerisigut, ilaqutariittut inuunerminni nukissaqarnerulernissamut periarfississavagut. Tamatuma saniatigut katsorsaanerup amerlanerit sulilernissamut piareersarsinnaavai, taamatullu nutaat atornerluinerit pinaveersaartissinnaallugit. Pinaveersaartitsinermut nukippassuit atorsimavagut, taakkuinnaalli tamakkiisumik sunniuteqanngillat. Uanga misilittakkama ilagivaat katsorsarneqarneq iluaqutaasartoq”, Martha Lund Olsen nangilluni oqarpoq.

”Isumaqarpunga utaqqinerput naammalersoq. Katsorsarneqarnissamik neqeroorutit piviusut pisariaqartippagut, innuttaaqataasut kinguaassiuutitigut atornerlugaasimasut ingerlaqqeriarnissaannut periarfissiisut”, Martha Lund Olsen naggasiivoq.

Angalaqatigiittartut suliatik aallarnerlugit sapaatip akunnerani uani Sisimiuni Aasiannilu katsorsaasalernissartik pillugu paasissutissiillutik suliffeqarfinnut innuttaasunullu ataatsimiisitsissapput.