Tuttut umimmaallu neqaannut atatillugu maleruagassat

Nalunaarutit atuuttut malillugit tuttut umimmaallu neqaannik pisaqarfimmiit nassarnissamut atatillugu maleruagassat.

Aalisarnermut, Piniarnermut Nunalerinermullu Naalakkersuisoqarfimmiit (APNN) tuttut umimmaallu neqaannik pisaqarfimmiit nassarnissamut atatillugu maleruagassat atuuttut matumuuna eqqaasissutigineqassapput.

Tuttut umimmaallu pillugit nalunaarutini atuuttuni § 12 malillugu tuttup umimmaallu pisarineqartup neqaa tamaat pisaqarfimmiit nassarneqassaaq. Pisap sinneri sapinngisamik aamma nassarneqassapput.

Tuttut umimmaallu pillugit nalunaarutini atuuttuni aalajangersakkanik unioqqutitsinermi tuttut nujuartat illersugaanerat piniagaanerallu pillugit nalunaarummi § 25 malillugu aamma umimmaat illersugaanerat piniagaanerallu pillugit nalunaarummi § 26 malillugu akiliisitsineq pineqaatissiissutaasinnaavoq kiisalu sunngiffimmi piniarsinnaanermut allagartaqarsinnaaneq imaluunniit inuussutissarsiutigalugu piniarnermut allagartaqarsinnaaneq piffissami killilikkami arsaarinnissutaasinnaapput.

Naalakkersuisoqarfiup maluginiarpaa pisaasimasunit timitaasut eqqarneqaannartarneranik pisoqartartoq, tamannalu Naalakkersuisoqarfiup akuerisinnaanngilluinnarpaa.