Ilinniarfik Online

Ilinniarfik Online

– Kalaallit Nunaanni inuiaqatigiit pillugit ilinniartitsinermi atortoq

Ilinniarfik online ilinniarnertuunngorniarfimmik aaqqissuusseqqinnermi atortoq
Ilinniarfik online tassaavoq ilinniartitsinermi atortoq nutaaq nutaaliorfiusorlu. Ilinniartitsinermi atuakkat atorunnaarput qarasaasiamillu ilinniartitsinermi atortunut internetimi ilinniarfik.mapicture.gl (tamanit pissarsiarineqarsinnaasoq) ingerlaqqiffiusinnaasumik taarserneqarlutik. Atortut GU Nuuk-mi ilinniartitsisut aamma Namminersorlutik Oqartussat suleqatigalugit Samo Olsenimit ineriartortinneqarput. Nuummi Deluxus Studiop grafikki suliaraa. Ilinniarfik online ilinniarnertuunngorniarfimmik aaqqissuusseqqinnermi augustimi 2012-imi atuutilersinneqartumi atortuuvoq. Tamanna isumaqarpoq ilinniartitsineq Kalaallit Nunaanni pissutsit tunngavigalugit, ilinniartunut sullissivik, pædagogik, suliaqarfiit akornanni annertunerusumik suliamik ingerlatsineq, oqaatsit aappaat atorlugit pædagogik aamma it atorlugit ilikkagaqartarneq aallaavigalugu ilinniartitsineq.
Atortuni tamani Kalaallit Nunaanni pissutsit pineqarput, ilinniartullu illoqarfik, nunaqarfik nunalluunniit immikkoortua najugarisartik najugaqarfiginikuusartilluunniit pillugu minnerpaamik ataatsimik arlalinnilluunniit naatsorsueqqissaarinernik takutitsivigineqartarput. Ilinniarfik online-imi qitiuvoq nammiilivinneq piviusunngussappat Kalaallit Nunaanni unammilligassagut periarfissagullu. Apeqqut tassaavoq ataatsimut tapiissutinik pisarunnaassagutta aningaasat suminngaaniit pissarsiarineqassanersut. Tamanna assersuutigalugu aatsitassat, ilinniagaqarneq innuuttaasullu ineriartornerat, pissutsit Kalaallit Nunaanni aningaasaqarnerup iliuuseqarnissamullu periarfissanut tamanut annertuumik pingaaruteqartut, pillugit pissusiviit aallaavigalugit ilinniartut nalilersussavaat.

Ilinniarfik online attaveqartitsilersarpoq ilinniartunillu suliaqartitsilersarluni. Teknikkikkut atortut ilinniartunik sullissivimmi pædagogikimi suliassat digitalinngorlugit suliarineqarsinnaanngortippaat, ilinniartut namminneq peqataanerisigut aammalu atortut atorlugit ilinniartut ingerlaavartumik akissuteqartarnerat atorlugu. Suliassanik suliaqarnerit tamarmik tassaapput ilinniartitsissutit arlallit suleqatigiissutigineqarnerat, pisoq atuarfiup avataani inuunermik takutitsisoq. Inuiaqatigiilerineq oqaluttuarisaanerlu pingaartumik Kalaallit Nunaanni namminiilivinnissaq pillugu pissutsinik takutitsinermut tapersiipput.
Ilinniarfik online kalaallisuujuvoq danskisuujullunilu, ilinniartullu ataasiakkat oqaatsit suut atorluarsinnaanerunerlugit namminneq aalajangissavaat. Aamma oqaatsit taakku marluk ilinniartut nikisittaqattaarsinnaavaat.

It-p ilanngunneqarnera: It inuusuttut amerlasuut ulluinnarni atortarpaat, atortullu pissutsimut tassunga naleqqussagaapput. Atortut suliarineqarnerat ilinniartitsinermi atuakkanit nalinginnaasunit allaaneruvoq, ikiuutillu immikkut ittut atorneqarnerat cand.pæc. Simon Skov Fougt It-didaktikimik immikkut ilisimasalik suleqatigalugu suliarineqarput.