Misissueqqittoqarnissaanik pilersaaruteqartoqanngilaq

Selvstyrebygningen i Nuuk
Eqqartuussissuserisoqatigiit Malling & Hansen Damm sulisunut marlunnut tunngatillugu inatsisilerituup naliliinera, Naalakkersuisut Siulittaasuata Naalakkersuisoqarfiani pisortaanerup Svend Hardenbergip eqqartuussissuserisoqatigiinnut suliareqqullugu qinnuitigisimasaa maanna naammassivoq. Pineqartut tassaapput inatsisilerinermi pisortaasimasoq Andreas Salmony kiisalu tusagassiinermi ataqatigiissaarisuugallartoq Julie Rademacher.

Svend Hardenbergip, Naalakkersuisut Siulittaasuata Naalakkersuisoqarfiani pisortaanerup misissuinerit pineqartuni taakkunani pissutsit qulaajarniarlugit inniminnersimavai.

- Pisuutitsiniarnerit asuulersimannginnerat asuleertuunnginnerallu pissutigalugit, allatut iliorneq akisussaassuseqanngitsuliornerussaaq. Misissuinermi inernerit maanna pigilerpagut, misissuinermilu inernerit pillugit oqassaanga, misissueqqittoqarnissaanut pissutissaqarsorinngilara.

Inatsisinik unioqqutitsisoqarsimanngilaq

Naalakkersuisut Siulittaasuata Naalakkersuisoqarfiani pisortaaneq Svend Hardenberg:

- Misissuinermi inerniliineq pingaarnerpaaq tassaavoq, sulianut pineqartunut marlunnut tunngatillugu inatsisinik unioqqutitsisoqarsimannginnera.

- Misissuinerup uppernarsarpaa, Naalakkersuisut politikkikkut atorfinitsitsinissaminnut tamakkiisumik pisinnaatitaaffeqartut - periarfissaq Naalakkersuisut siuliisa aamma atortarsimasaat. Kisianni maluginiarpara Julie Rademacherip Naalakkersuisut Siulittaasuata Naalakkersuisoqarfianut tusagassiinermi ataqatigiissaarisutut attaveqarnera kusanarnerusumik naammassineqarsimasinnaagaluartoq. Siumut isigisumik immikkut ittumik siunnersortit atorfinitsinneqartarnerisa atorfinitsitsinermut atatillugu aqulluarneqarnerunissaat sukumiinerusumik ingerlanneqartassaaq.

- Inatsisilerinermi pisortaasimasumut Andreas Salmonymut tunngatillugu ajuusaarutigissavara, Andreas Salmony misissuinermi peqataarusussimanngimmat, kisianni taamaakkaluartoq assiliap ataatsimut isikkua allanngunngilaq, tassalu ajoraluartumik inatsisilerinermi siunnersorneqarnikkut annertuumik kukkusumillu siunnersuisoqarsimammat.