Misileraalluni qaleralinniarneq

2013-imi Qeqertarsuup Tunuani misileraalluni qaleralinniarneq

Naalakkersuisut ulloq 22. august aalajangerput 2013-ip sinneranut katillugit qaleralinnik 700 tonsinik misileraalluni qaleralinniarnissaq akuersissutigissallugu. Qaleralinniarneq piffinni pingasuni aalajangersimasuni ingerlanneqassaaq, umiatsiallu 6 meteri ataallugu takissusillit kisimik aalisarnissaminnut periarfissaqarput.

Aalisartut piffimmi pineqartumi sukumiisumik oqaloqatigereerlugit Naalakkersuisut ulloq 12. september aalajangerput, aalajangerneq qulaani pineqartoq aggustimeersoq nalimmassarneqassasoq. Taamaasilluni misileraalluni aalisarnermut atatillugu piffiit misileraaffiit marlunnik ilaneqarput. Piffiit taakkua misileraaffinnut pingasuusunut aallaqqaammut misileraaffiusunut naleqqiullugit Ilulissanut qaninnerujussuupput. Piffiit misileraaffiusut marluk nutaat ilanngussami matumunnga ilanngunneqarsimasumi aappalaartumik nalunaaqutserneqarsimapput.

Misileraalluni aalisarnermi katillugit pisassiissutigineqartut suli 700 tonsiupput, taakkualu qaammatikkaartumik ataani allassimasutut agguataarneqarsimapput.

September: 200 tons
Oktober: 200 tons
November: 200 tons
December: 100 tons

Naggasiutigalugu ilisimatitsissutigineqassaaq, Pinngortitaleriffik suleqatigalugu misileraalluni aalisarnermut atatillugu malittarisassat arlallit suliarineqarsimammata. Taakkua tassaapput malittarisassat uuttortaanermut, pisanik nalunaarutiginnittarnermut il. il. tunngassuteqartut. Taakkua ilanngussami matumunnga takuneqarsinnaapput.