Isumaqatigiinnermi innuttaasunik peqataatitsineq pitsaanerulertarpoq

Aatsitassarsiornermut suliassanut atatillugu innuttaasunik peqataatitsinerup pitsaanerunissaa arlalinnit kissaatigineqarpoq – kingullermik True North Gems-ip suliassaanut (TNG-mi suliassaq) atatillugu saqqummerluni. Oqallinnermut nangissutigalugu NGO-t paasititsiniaanermik suliaqarnerannut aamma tusarniaanerit inatsisitigut aalajangerneqartut ingerlanerannut amerlanerusunik aningaasaliinissamik siunnersuut saqqummerpoq.

Aallarniutigalugu ilisimatitsissutigerusuppara TNG-mi suliassamut atatillugu aggustip ingerlanerani tamanut ammasumik ataatsimiititsinerit arfinillit ingerlanneqarsimammata, taakkunanilu pingasuni peqataavunga.
Ataatsimiititsinerit taaneqartut pillugit oqallittoqangaatsiarpoq, minnerunngitsumik ataatsimiititsinerit sivisunerusumik piffissaqartitsiviusumik qaaqqusiviusariaqarsimanersut. Tassunga atatillugu ilisimatitsissutigisinnaavara Kalaallit Nunaata avataani ministerit ataatsimiinnerini allani peqataanissamut pisariaqartitsineq pissutigalugu, tusarniaalluni ataatsimiititsinerit sapaatit akunnerannut 35-mut siuartinneqarmata.

”Pisimasoq uggornarpoq, kisianni ajoraluartumik ulluinnarni ulapaarfiusartuni pinngitsuuinneqarsinnaanngilaq. Kisianni aappaatigut erseqqissarusuppara, atituumik soqutigisaqartunik peqataatitsinissamik kisaateqanngitsunga tamanna takussutissaanngimmat. Naamerluinnaq. Pingaartittorujussuuara”, oqarpoq Jens-Erik Kirkegaard, Inuussutissarsiornermut Aatsitassaqarnermullu Naalakkersuisoq nangillunilu:
”Taamaattumik soqutigisaqartunut qaaqqusissummik nassiussivunga, sammisaq pillugu oqaloqatigiinneq nanginniarlugu ulloq 11. september naapikkusunnersut tusarniarlugu”.

Maannamut oqallinnerit aallaavigalugit aammalu ilaatigut soqutigisaqartut oqaatigisaasa malitsigisaanik, 2014-imi upernaakkut ataatsimiinnermi aatsitassanut ikummatissanullu inatsimmi tusarniaanermut aalajangersakkanik aalajangersimasunik siunnersuuteqarlunga saqqummiussilersaarpunga”.

Iluaqutissartaasut takulertoruminarput. Soqutigisaqaqatigiinnut taamatullu ingerlatsivimmut tamanna pisariinnerusumik aallaaviussaaq – soqutigisaqaqatigiit aalajangersakkat aalajangersimasut ilisimaarissavaat, tamannalu aamma ingerlatsivimmut soqutigisaqaqatigiit innuttaasunik peqataatitsinissamut akerleriittunik kissaateqarsinnaasartut misigisaqarsimasumut siumoortumik eqqoriaruminarnerulissaaq.

Tamatuma saniatigut maluginiarpara soqutigisaqaqatigiit tapiissutissanik qinnuteqarfigisinnaasaannik aningaasanik immikkoortitsisoqarnissaanik– imaluunniit suliassanut tamanut ammasumik tusarniaassutigineqartunut atatillugu immikkut ilisimasalinnik peqataatitsisarnissamik – kissaateqartoqartoq.
”Siunnersuummik taamaattumik, taamaattoqassappat aningaasalersorneqartariaqartumik, akuersititsinissaq ajornassannginnersoq takorusuppara”, naggasiivoq Jens-Erik Kirkegaard.