Issittoq oqaluuserineqartunut ilaasoq

Stemningsbillede af Indlandsisen USA-p præsidentiata ulloq 4. september sulinermut atatillugu Danmarkip, Sverigep, Norgep aamma Islandip statsministerii kiisalu Finlandip præsidentia ilaatigut Issittoq oqaluuserisassanut ilaatillugu nereqatigai.

USA-p præsidentiata Barack Obamap Sverigemut tikeraarneranut atatillugu Sverigep statsministeriata Nunani Avannarlerni statsministerit naalakkersuisullu siulittaasui suleqatigiilluni nereqatigiinnermut ulloq 4. september qaaqqusimavai. Nereqatigiinnermi Obamap Sverigellu statsiministeriata Fredrik Reinfeldtip saniatigut Finlandip præsidentia Sauli Niinistö, Danmarkip statsministeria Helle Thorning-Schmidt, Islandip statsministeria Sigmundur David Gunnlaugsson aamma Norgep statsministeria Jens Stoltenberg peqataapput.

Nereqatigiinnermi ilaatigut nunanut allanut politikkimi apeqqutit kiisalu Issittumut Siunnersuisoqatigiit eqqartorneqarput. Issittoq pillugu eqqartuinerit Issittup avatangiisaanik aamma Issittumi inuuniarnikkut atugassarititaasut pitsanngorsanissaannik, taakkualu Issittumi nunap inoqqaavi ataqqillugit ingerlanneqartarnissaannik imaqarput. Ataatsimiinnermi inerniliussat ataatsimeeqatigeeriitsiarnerup naammassineqarnerata kinguninngua ataatsimut oqaaseqaateqarnermik uppernarsarneqarput.

Naalagaaffeqatigiit siorna ataatsimeeqatigeereernerisa kingorna statsministerip Helle Thorning-Schmidtip kalaallit Naalakkersuisuinut uppernarsaraluarpaa, Issittoq Kalaallit Nunaallu nunat tamalaat akornanni ataatsimiinnerni oqaluuserisassaniikkaangat, taava Kalaallit Nunaat ataatsimiinnerni peqataasassasoq. Taamatut pisoqassanngitsoq danskit naalakkersuisuisa pisumi matumani aalajangersimavaat.


Naalakkersuisut siulittaasuat, Aleqa Hammond:

- Nuannaarpunga Issittoq nunat tamalaat akornanni taama qaffasitsigisumi ataatsimiinnermi oqaluuserisassani ilaatinneqarmat, aamma USA’p præsidentiata Nunani Avannarlerni statsministerit naalakkersuisullu siulittaasuinik ataatsimeeqatigiinnerinut atatillugu.

- Kisianni pakatsissutigaara, Danmarkip Kalaallit Nunaata ataatsimiinnermi toqqaannartumik peqataanissaa pisariaqanngitsutut isigisimammagu. Statsminiterimut Helle Thorning-Schmidtimit erseqqissarnikuuara, Issitttoq Kalaallit Nunaallu nunanut allanut eqqartorneqartillugit Kalaallit Nunaata tusaaneqartarnissaa - nunallu tamalaat akornanni ataatsimiinnerit pineqartillugit - aamma politikerit atorfillillu ataatsimiinnerinut atatillugu.

- Pingaaruteqarpoq erseqqissassallugu, danskit naalakkersuisui tassaammata nunanut allanut sillimaniarnermullu politikkikkut apeqqutinut akisussaanerpaammata, taamaattumillu Kalaallit Nunaat suli apeqqutinut Kalaallit Nunaannut pingaaruteqartunut ilaatinneqartassaaq.

- Helle Thorning-Schmidt Obamamik ataatsimeeqateqarnissaq pillugu qanimut oqaloqatigisimavara - aamma naalagaaffeqatigiit ukioq manna ataatsimiinneranni - Danmarkimi sapaatip akunnerani kingullermi pisumi -kisianni danskit naalakkersuisuisa naalagaaffeqatigiit ataatsimeeqatigeereernerannit sapaatip akunnera ataaseq qaangiutiinnartoq danskit kalaallillu Kalaallit Nunaat Issittorlu nunat tamalaat akornanni ataatsimiinnerni oqaluuserisassani ilaatillugu Kalaallit Nunaata peqataatinneqartarnissaa pillugu isumaqatigiissut qulaatiinnarpaat.

- Apeqqut manna Helle Thorning Schmidtimut siunissami qaninnermi eqqartoqqissavara.



Annerusumik attaveqarniaraanni aqqutigineqassaaq:
Sofia Geisler, Attaveqaqatigiinnermut pisortaq, Mobil +299 559424