Siumukarneq – aamma inoqarfinni minnerusuni

nunaqarfik

 

Inoqarfiit minnerusut siunissaat ineriartortinneqarnissaallu ulluni 14.-15. september oqaluuserineqassaaq. Nunaqarfinni aqutsisut siulittaasuisa 26-usut naapissavaat borgmesterit sisamat, Naalakkersuisut aammalu Inatsisartuni ataatsimiititaliat pingasuusut siulittaasui.

Naalakkersuisut isumasioqatigiinneq taanna aallarnerfigalugu eqqartortilerpaat nunaqarfiit qanoq nunap sinneranut iluaqutaasinnaanersut, aamma inoqarfinni minnerusuni innuttaasut inuussutissarsiornikkut patajaannerujusumik ingerlatsilernissamut peqataasinnaanersut.

Naalakkersuisunut pingaarpoq nunaqarfiit siunissaasa oqallisaanerani oqaatsit ilisimatoorpalaartut atorlugit aningaasaqarnerup sammisallu tigussaanngitsut kisimik tusarsaannginnissaat. Nunap siunissaa pilersinneqassaaq innuttaasunit eqeersimaartunit suliffeqarfinnillu napasinnaasunit, iluatsitsisinnaasimanerminnut misilittakkatik oqaluttuariniarlugit isumasioqatigiinnermi matuma aamma peqataasunik.

Nunaqarfiit aqunneqarnerannut killissaritat aalajangersaavigineqareerput, periarfissaqalissaarlu Inatsisartut ukiamut ataatsimiinneranni kommunit aqunneqarnerat pillugu allannguutissatut Naalakkersuisut siunnersuutaat akuersissutigineqarpat, siornatigut kommuniusimasuni illoqarfinni najukkani ataatsimiititalianik ilaneqarsinnaalernissaat.

Pissusiviusoq killiffigisatsinni aallaaviusoq tassaavoq, nungusaataanngitsumik ineriartortitsineq aamma imminut aningaasarsiornikkut napatinnerulernissamik anguniakkat kiisalu nammineernerulernissamik kissaateqarneq ilanngullugit, najugaqarfiit mikinerit ineriartortinneqarnissaasa oqallisigineqarnerat aamma suut pisariaqarnersut anguniakkat taakku anguneqassappata.