Tanbreez-ip aatsitassanut qaqutigoortunut suliassaanut tusarniaaneq

Kalaallit Nunaata kujataani Tanbreez-ip aatsitassanut qaqutigoortunut suliassaanut tusarniaaneq

Tanbreez Mining Greenland Kalaallit Nunaata kujataani Killavaat Alannguanni aatsitassanut qaqutigoortunut suliassamut piiaanissamut akuersissummik qinnuteqaammik Naalakkersuisunut nassiussivoq. Ingerlatseqatigiiffiup inatsisit malillugit piumasaqaatit ulloq manna naammassisimavai, taamaattumillu suliassamik tamanut ammasumik tusarniaassutigineqarnissaa pisinnaatitaaffigaat.

Suliassamut tusarniaanermut piffissaq tassaavoq 2013-imi ulloq 4. septembarimiit 2. decembarimut.

Tusarniaanermut piffissaliussaq qaammatinit marlunnit pingasunut sivitsorneqarpoq, taamaalilluni suliassamut oqaaseqarnissamut piffissaqarluassaaq, tamatumalu saniatigut piffissaq ulapaarfiusartoq Ukiaanerani ataatsimiinnerup aallartinnerani pilertartoq sillimaffigineqarpoq.

Suliassaq pillugu tusarniaanermut najoqqutassat nassaarineqarsinnaapput uani. Tusarniaanermut oqaaseqaataasussat Aatsitassanut Ikummatissanullu Aqutsisoqarfimmut nassiunneqassapput.

”Neriuppunga amerlasoorpassuit suliassaq pissanganartoq pillugu atuagassat atuarumaaraat aammalu isummersuutiminnik saqqummiijumaartut. Suliassaq angisoorujussuuvoq inuiaqatigiinni nalinginnaasumik pingaartumillu Kalaallit Nunaata kujataani suliffissanik nutaanik kinguneqartussaalluni”, oqarpoq Jens-Erik Kirkegaard, Inuussutissarsiornermut Aatsitassaqarnermullu Naalakkersuisoq nangillunilu:
Tusarniaalluni ataatsimiititsinissanut piffissaq sumiiffissarlu aalajangersarneqareerpata, taakkua tamatuma kingorna sukkanerpaamik, taamaattorli minnerpaamik sapaatit akunneri marluk sioqqullugit, allagarsiissutigineqassapput.
Ingerlatseqatigiiffiup Tanbreez Mining Greenland-ip Inuiaqatigiinni piujuartussamik iluaqutaasumik sunniutaasussanik nalilersuineq (VSB) aamma Avatangiisinut sunniutaasussanik nalilersuineq (VVM) suliarereerpai. Nalunaarusiat suliassap tamanut ammasumik tusarniaassutigineqarnerani ilaapput.

Paasissutissat erseqqinnerusut:
Jens-Erik Kirkegaard, Inuussutissarsiornermut Aatsitassaqarnermullu Naalakkersuisoq