Sukatiterisoqassaaq

Namminersorlutik Oqartussani atorfinni qaffasinnerusuni atorfinitsitsiniarnermi malittarisassat misissoqqissaarneqalerput sukatiterneqaqqillutillu

Atorfinitsitsinissamut siunnersortitut atorneqartup suliffeqarfiup Ramsdalip siunnersuinera kiap atorfinitsinneqarnissaanik innersuussusiortussap ataatsimiititaliap pisortaanermit Svend Hardenbergimit siulittaasuuffigineqartup tatigalugu pisimavaa. Atorfinitsitsiniarnermi siunnersortitut atorneqartup suliassaasa pingaarnersaraat Aningaasaqarnermut Nunamullu Namminermut Naalakkersuisoqarfiup pisortassaanik eqqortumik nassaarniarnermi atorfinitsitsinissamut ataatsimiititaliamut patajaatsumik siunnersortaanissaq.

- Siunnersortitut atorneqartut inuttassarsiuussinerup ingerlanera tamaat siunnersuinerat kiap atorfinitsinneqarnissaanik innersuussusiortussap ataatsimiititaliap apeqqusissallugu pissutissaqarsorisimanngilaq. Ajoraluartumilli maanna oqaatigisariaqarput pissutsit allarluinnaasut, Svend Hardenberg oqarpoq.

Aningaaserivimmi Danske Andelskassers Bankimi atorfeqarnermi nalaani Carsten Frank Hansenip peqquserluuteqarsimasinnaaneranik politiinit pasineqarnera kiap atorfinitsinneqarnissaanik innersuussusiortussamit ataatsimiititaliamit ilisimaneqarsimasuuppat Carsten Frank Hansen piukkussanut ilaasimanavianngitsoq Svend Hardenbergip qularutiginnangilaa.

Peqquserluuteqarsimasutut pasineqarnera atorfinitsitsinissamut siunnersortitut atorneqartunit aamma paasineqarsimanngilaq. Taamaattoq Svend Hardenbergip nalornissutiginagu inernilerpaa nunatsinni atorfiit pingaarnersaasa ilaannut Carsten Frank Hansenip atorfinitsinneqarnissaata aalajangerneqarnissaata tungaanut siunnersortitut atorneqartup suliffeqarfiup Carsten Frank Hansen pillugu paasissutisanik katersinermini sulisimanera sukumiisimanngitsoq.

- Carsten Frank Hansenip atorfinitsinneqarnissaanut aalajangerneq naggaterpiaatigut kiap atorfinitsinneqarnissaanik innersuussusiortussami ataatsimiititaliami siulittaasutut uanniippoq. Tamanna qimarratiginianngilara. Pisumili uani misissugassaavoq suliffeqarfiup atorfinitsitsinissamut atatillugu siunnersortitut atorsimasatta aningaasarsiarisimasaat utertissallugit tunngavissaqarnersoq. Suliffeqarfimmi aamma maanna suliniutigalugu aallartereerparput nalilersueqqinneq, Namminersorlutik Oqartussani qaffasissumik atorfiit inuttalerneranni malittarisassat sukaternissaannik siunertaqartoq.


Inussiarnersumik inuulluaqqusillunga

Svend Hardenberg, Pisortaaneq
Naalakkersuisut Siulittaasuata Naalakkersuisoqarfia