Paakitsoq ammarpoq

 

Naalakkersuisoq Miiti Lynge, aamma Nukissiorfiit pisortaat Henrik Estrup, kiisalu Istak-imiit projektleder
Gisli H. Gudmundsson.

***

Ineqarnermut, Pinngortitamut Avatangiisinullu Naalakkersuisup Miiti Lyngep Ilulissani Paakitsumi erngup nukinganik innaallagissiorfik Naalakkersuisut sinnerlugit ammassavaa.

Erngup nukinganik innaallagissiorfik Kalaallit Nunaanni erngup nukinganik innaallagissiorfiit annersaata tulleraa. Erngup nukinganik innaallagissiorfik 2012-imi innaallagissiulerpoq, kisiannili erngup nukinganik innaallagissiorfiup matuersaatai aatsaat septembarip ulluisa arfernanni Paakitsumi erngup nukinganik innaallagissiorfiup ammaanersiorneqarnerani Nukissiorfinnut tunniunneqassapput. Ammaanersiornermut aamma borgmesteri Ole Dorph, najukkami inuussutissarsiutinik ingerlataqartut kiisalu entreprenørimit ISTAK-imit aallartitat peqataassapput.

Miiti Lyngep ineriartorneq naammagisimaarluarpaa oqarlunilu: ”Manna nukissiornermi immitsinnut pilersuleriartuinnarnitsinnut assersuutissaalluarpoq. Isumalluutinik pinngortitap uatsinnut pissarititaanik atorluaaneq kalaallit kulturiannut naapertuulluinnarpoq. Erngup nukinganik innaallagissiorfik uuliamik eqqussuinermik pinngitsuuisinnaannginnitsinnik annikinnerulersitsivoq, tamannalu atuisunut silallu pissusianut pitsaasuuvoq.”

Erngup nukinganik innaallagissiorfik aamma Ilulissani atuisunut nutaarsiassaalluarpoq, taakku siunissami nukissiuutit ataavartut silap pissusaanut artukkiinngitsut atorlugit innaallagissiamik eqqasuuteqaratik atuisinnaalersussaammata.

Erngup nukinganik innaallagissiorfiup atulernerani gassinik silaannarmik kissakkiartortitsisartunik (kuldioxid, metan aamma lattergas) aniatitsinermi 2014-imi 174.707 ton CO2-nnguuttartut sipaarneqartussaapput. Tamanna 2011-mi aniatitat 23%-iisa missaannut naapertuuppoq.

Erngup nukinganik innaallagissiorfik, Nukissiorfinnit Nunap karsianit taarsigassarsilluni sananeqartoq, sananeqarnerminni katillugit 600 mio. koruunit missaannik akeqarsimavoq.

 

Attaveqarfissaq: Apeqqutissaqarnermi attaveqarfigineqassaaq: Naalakkersuisoq Miiti Lynge tlf: (+299) 345000. e-mail: IPAN@nanoq.gl